ԵՐԵՎԱՆ, 30 օգոստոսի — Sputnik. Արամ Պետրոսյանի փաստաբան Ստանիսլավ Մալցևը ՌԻԱ Նովոստիին հայտնել է, որ բժիշկներն են խորհուրդ տվել Արամ Պետրոսյանին դադարեցնել հացադուլը։
«Բժիշկները խորհուրդ են տվել, ու մենք էլ, որպես փաստաբաններ, նրան խորհուրդ ենք տվել չվտանգել առողջությունը»,- ասել է փաստաբանը:
Նա պարզաբանել է, որ կալանքի մասին որոշման հրապարակումից հետո Պետրոսյանի ինքնազգացողությունը վատացել է ու շտապօգնություն են կանչել դատարան: Մալցևը նաև նշել է, որ առայժմ ոչ մի քննչական գործողություն իր պաշտպանյալի նկատմամբ չի իրականացվում:
«Այս շաբաթ կստուգեն նրա ցուցմունքները տեղում, այսինքն` բանկի մասնաշենքում»- ասել է փաստաբանը:
Հիշեցնենք, որ սնանկ գործարար Արամ Պետրոսյանը չորեքշաբթի երեկոյան 4 հոգու պատանդ էր վերցրել Մոսկվայի կենտրոնում գտնվող «Սիթիբանկի» մասնաճյուղում և սպառնացել էր պայթեցնել շենքը: Ավելի ուշ, սակայն, տղամարդը բաց էր թողել պատանդներին և հանձնվել իրավապահներին: Առարկան, որը նա ռումբ էր ներկայացրել, կեղծ էր եղել: ՌԴ քրեական օրենսգրքի համաձայն` Պետրոսյանի արարքը պատժվում է 6-ից մինչև 15 տարի ազատազրկմամբ:
