ԵՐԵՎԱՆ, 12 հուլիսի — Sputnik, Լաուրա Սարգսյան. Armenia ընկերության տնօրենների խորհուրդը որոշել է 100 հազար դոլար հատկացնել` քաղավիացիայի նախկին օդաչուներին արտոնյալ պայմաններով տոմսեր տրամադրելու համար։ Armenia-ի թռիչքների մեկ տարվան նվիրված միջոցառման ժամանակ այս մասին հայտարարեց ընկերության գլխավոր տնօրեն Ռոբերտ Օգանեսյանը։
«Սա մեր նվերն է ավիացիայի վետերաններին։ Թոշակի գնացած օդաչուն միևնույն է` օդաչու է»,- ասաց Օգանեսյանը` ամփոփելով ընկերության գործունեության մեկ տարին։
Ավիաընկերության ներկայացուցիչները որոշել են այսպես շնորհակալություն հայտնել այն մարդկանց, ովքեր իրենց դերն են ունեցել երկրի քաղավիացիայի կառուցման գործում։ Armenia-ն տոմսերը կսկի տրամադրել հաջորդ տարվանից։
Քաղավիացիայի գլխավոր վարչությունից Sputnik Արմենիային հայտնեցին, որ այսօր Հայաստանում քաղավիացիայի 30 վետերան կա։
«Ցանկացած բիզնես, որը հոգ կտանի իր վետերանների մասին, զգալիորեն կթեթևացնի նրանց կյանքը»,- ասաց Օգանեսյանը։
Կարճ ժամանակահատվածում ավիաընկերությունը զգալի քայլեր է կատարել քաղավիացիայի ոլորտում. գործարկվել են Երևանից Բեյրութ, Թել Ավիվ, Մինվոդի, Վորոնեժ կանոնավոր չվերթերը։ Armenia-ի օդանավերը նաև չարտերային ուղևորափոխադրումներ են իրականացվում Թեհրանի, Սալոնիկի, Բարսելոնայի և մի շարք այլ քաղաքների ուղղությամբ։ Մեկ տարվա ընթացքում ավիաընկերությունը մոտավորապես 65000 ուղևոր է տեղափոխել։
Armenia-ի ավիապարկում երկու ինքնաթիռ կա` Boeing 737-500, Boeing 737-700։ Ընկերությունն ունի 53 աշխատակից։
Ավիաընկերության հիմնադիրներն են Աշոտ Թորոսյանը (51 տոկոս բաժնետոմս), Թամազ Գաիաշվիլին (24 տոկոս) և Ռոբերտ Օգանեսյանը (25 տոկոս): Հայաստանն ազգային ավիափոխադրողից զրկվել է 2013 թվականին` «Արմավիա» ընկերության սնանկացումից հետո: Այնուհետև ավիաշուկայում հայտնվել է AirArmenia ավիաընկերությունը, որն էլ 2014 թվականի հոկտեմբերին, հայտնվելով սնանկացման եզրին, դադարեցրել է թռիչքները։
