«Այս տարվա ընթացքում մենք զգալի հաջողությունների ենք հասել. մոտավորապես 65000 ուղևոր ենք տեղափոխել։ Ավիաընկերությունն այս ընթացքում սովորեցրել և ինքնուրույն չվերթերի է նախապատրաստել հրամանատար Հովհաննես Խաչատրյանին և 4 օդաչուի, որոնցից երկուսն արդեն ինքնուրույն են իրականացնում թռիչքները», – միջոցառման ժամանակ ասաց Armenia ավիաընկերության գլխավոր տնօրեն Ռոբերտ Օգանեսյանը։
Կարճ ժամանակահատվածում ավիաընկերությունը զգալի քայլեր է կատարել քաղավիացիայի ոլորտում. գործարկվել են Երևանից Բեյրութ, Թել Ավիվ, Մինվոդի, Վորոնեժ կանոնավոր չվերթերը։ Armenia–ի օդանավերը նաև չարտերային ուղևորափոխադրումներ են իրականացվում Թեհրանի, Սալոնիկի, Բարսելոնայի և մի շարք այլ քաղաքների ուղղությամբ։
Գործունեության մեկ տարվան նվիրված միջոցառման ժամանակ ավիաընկերության ղեկավարությունը ներկայացրեց նաև «Armenia» ամսագրի երրորդ համարը։ Հայաստանն իր ողջ բազմազանությամբ ներկայացնող ամսագրի էջերում տեղ են գտել նաև Sputnik Արմենիա միջազգային տեղեկատվական գործակալության հրապարակումները։ «Armenia» ամսագիրը ստեղծվել է թռիչքի ընթացքում ուղևորների ժամանցն ապահովելու համար։
«Պատկերացրեք մի իրավիճակ, երբ հայտնվում եք փակ տարածության մեջ, որտեղ չկա համացանց ու հեռուստացույց: «Armenia» ամսագիրը ստեղծվել է հենց այդ նպատակով, որպեսզի ուղևորը հայտնվելով օդանավում` կարողանա օդանավաում անցկացրած 2 կամ 2.5 ժամն ավելի հաճելի դարձնել», – ասաց ընկերության հասարակայնության հետ կապերի բաժնի տնօրենի տեղակալ Գևորգ Խաչատրյանը։
Ամսագրում ներկայացված են Հայաստանի, հայկական խոհանոցի, սպորտի և զբոսաշրջության ոլորտին վերաբերող թարմ նորությունները։
Ավիաընկերության հիմնադիրներն են Աշոտ Թորոսյանը (51 տոկոս բաժնետոմս), Թամազ Գաիաշվիլին (24 տոկոս) և Ռոբերտ Օգանեսյանը (25 տոկոս): Հայաստանն ազգային ավիափոխադրողից զրկվել է 2013 թվականին` «Արմավիա» ընկերության սնանկացումից հետո: Այնուհետև ավիաշուկայում հայտնվել է AirArmenia ավիաընկերությունը, որն էլ 2014 թվականի հոկտեմբերին, հայտնվելով սնանկացման եզրին, դադարեցրել է թռիչքները։
