ԵՐԵՎԱՆ, 12 հուլիսի — Sputnik. Էդվարդ Նալբանդյանի և Էլմար Մամեդյարովի շփման բուն փաստն այն մասին է խոսում, որ իրավիճակը Արցախում լարված է, սակայն այն շարունակում է մնալ քաղաքական դաշտում, Sputnik Արմենիայի հետ հարցազրույցում ասաց Անդրանիկ Միհրանյանը։
Հուլիսի 11–ի երեկոյան Բրյուսելում կայացավ Հայաստանի և Ադրբեջանի արտգործնախարարներ Էդվարդ Նալբանդյանի և Էլմար Մամեդյարովի հանդիպումը ԵԱՀԿ Մինսկի խմբի հովանու ներքո։ Նախարարների հանդիպումն անցավ արցախյան հակամարտության սրացումների ֆոնին։
Ինչպես նշեց Հայաստանի արտգործնախարարը` պայմանավորվածություն է ձեռք բերվել նախարարների մակարդակով հանդիպում կազմակերպել տվյալ տարվա սեպտեմբերին Նյու Յորքում ` ՄԱԿ–ի Գլխավոր ասամբլեայի նստաշրջանի ընթացքում։
«Հակամարտող կողմերի միջև դիվանագիտական ուղու շարունակությունը հասկանալի դարձրեց, որ առաջիկայում պատերազմի սպառնալիք չկա»,– ասաց Միհրանյանը։
Մինչև տարեվերջ Հայաստանի և Ադրբեջանի առաջնորդների հնարավոր հանդիպմանը անդրադառնալով` Անդրանիկ Միհրանյանը ընդգծեց, որ թերահավատորեն է տրամադրված և չի էլ մտածում, որ նույնիսկ այդպիսի ձևաչափը կարող է երկար սպասված ձեռքբերումների բերել։
«Կողմերից մեկը չի բացառում խնդրի լուծման ուժային տարբերակը։ Այդ ֆոնին բանակցություններին մասնակցելու պատրաստակամությունը վկայում է այն մասին, որ գերտերությունները չեն սատարի այսպիսի մոտեցումը։ Խոսքը ԵԱՀԿ Մինսկի խմբի համանախագահ երկրների մասին է»,– ասաց քաղաքագետը։
Միհրանյանը կարծում է, որ հիմա Ադրբեջանը ակտիվացրել է հարաբերությունները տարածաշրջանի ազդեցիկ երկրների հետ, և դա կարող է օգտագործվել նրանց կողմից Հայաստանի վրա ճնշում գործադրելու համար` առաջնագծում իրավիճակը հերթական սրեցման դեպքում։
Նրա կարծիքով՝ հայկական կողմը պետք է ամրացնի իր պաշտպանությունը` լայնածավալ ռազմական գործողությունները բացառելու նպատակով և միջնորդների ուշադրությունը դարձնի առաջնագծի ռազմական ակտիվությանը։
Եթե հակամարտության գոտում նորից լայնածավալ գործողություններ սկսվեն, ապա, քաղաքագետի կարծիքով, դա կարող է իրարանցում առաջացնել տարածաշրջանում, որը ոչ պակաս պայթունավտանգ Մերձավոր Արևելքի հարևանն է, և կայունության միտումները կրկին վտանգի տակ կհայտնվեն։
