ԵՐԵՎԱՆ, 4 հուլիսի — Sputnik. Կենդանաբանական այգու այցելուներն այսուհետև հնարավորություն կունենան տեսնելու նաև բորենի, գայլ, ընձառյուծ, կատվային լեմուր, առյուծ, հիմալայան արջ կենդանատեսակներին: Այս մասին հայտնում է Կենդանաբանական այգու մամուլի ծառայությունը:
Հաղորդագրության մեջ նշված է, որ վագրերի ազատավանդակի հարակից տարածքը շարունակում է փակ մնալ:
Այգին շարունակում է աշխատել սովորական աշխատանքային ժամանակացույցով` առավոտյան 9-ից մինչև 22:00-ն (բացառությամբ երկուշաբթի օրերի): Տոմսերի վաճառքը մինչև 21:00-ն:
Այգում իրականացվող շինարարական աշխատանքներն անցկացվում են Երևանի կենդանաբանական այգու վերանորոգման և բարեկարգման ծրագիրի 2-րդ փուլի շրջանակում: 2014 թ.-ին մեկնարկած երկարաժամկետ և բազմաբաղադրիչ նախագիծն իրականացվում է Երևանի քաղաքապետարանի ֆինանսավորմամբ:
