ԵՐԵՎԱՆ, 23 սեպտեմբերի– Sputnik. Թե՛ մեծերը, թե՛ փոքրերը սիրում են այցելել կենդաբանական այգիներ, որպեսզի տեսնեն, թե ինչպես են ապրում մեր կրտսեր եղբայրները։ Նրանք հիանում են կենդանիների զարմանահրաշ աշխարհով վանդակներից և պատնեշներից այն կողմ։ Sputnik Արմենիա պորտալը որոշել է ցույց է տալ իր ընթերցողներին կենդանիների կյանքը վանդակի ներսում այն մարդկանց աչքերով, ովքեր օր ու գիշեր հոգ են տանում նրանց մասին` փորձելով առավելագույն հարմարավետ կյանք ապահովել Երևանի կենդանաբանական այգու բնակիչների համար։
Սևագլուխ սկյուռակապիկ
Սևագլուխ սկյուռակապիկը պրիմատների դասի ներկայացուցիչ է, որն ապրում է Հարավային Ամերիկայում։
Երևանի կենդաբանաբանական այգու մի քանի սկյուռակապիկներն ապրում են փոքրիկ կղզում։ Նրանց կերակրելու համար այգու աշխատակիցներն օրական մի քանի անգամ նավակով հասնում են նրանց մոտ։ Sputnik Արմենիայի ֆոտոթղթակիցն անցել է այդ ճանապարհը, որպեսզի նկարի սկյուռակապիկներին։
Լեմուրներ
Կատվային լեմուրները մադագասկարյան լեմուրների ընտանիքի էնդեմիկ տեսակներից մեկն են, բնակվում են Մադագասկարում։ Կենդանաբանական այգում բնակվում է լեմուրների ընտանիք` մայրը, հայրը և երկու ձագերը։ Այդ կենդանիները չափազանց մարդամոտ են և հետաքրքրասեր։ Նրանց սևեռուն ուշադրության առարկան է դարձել, մասնավորապես, Sputnik Արմենիայի թղթակցի լուսանկարչական խցիկը։
Երևանի կենդաբանական այգում կապիկների մասին հոգ է տանում Գայանե Գմփոյանը, ով այստեղ աշխատում է արդեն 8 տարի։ Նա խնամում է տարբեր տեսակի 20 կապիկների։
«Մեզ մոտ բնակվում են պավիան համադրիլներ, ռեզուս մակականեր, սևագլուխ սկյուռակապիկներ, լեմուրներ, ճապոնական մակականեր։ Կապիկները մարդկանց նման ամենակեր են։ Նրանց սննդակարգի մեջ մտնում է միրգ, բանջարեղեն, շիլաներ, միս, ձու և ձուկ»,– պատմեց Գմփոյանը։
Նա համոզված է, որ կապիկները ճանաչում են իրեն, զգում են իր տրամադրությունը։
Առանց եղջյուրների եղջերունե՞ր
Երևանի կենդաբանական այգու բաց վանդակում ապրում են 15 եղջերուներ։ Զարմանալի չէ, որ նրանցից մի քանիսը մնացել են առանց եղջյուրների։ Աշնանը նրանց մոտ «ամուսնական սեզոն» է, այնպես որ շատ եղջյուրներ դառնում են նրանց մարտերի «զոհը»։
Մե՜ծ գետաձին
Կենդանաբանական այգու այցելուները միշտ անհամբերությամբ սպասում են ժամը 17։30–ին։ Այդ ժամին մաքրում են գետաձիու ատամները։ Բնական պայմաններում այդ առաքելությունն իրականացնում են թռչունները, իսկ այգում դա անում է մարդը։
Թայֆուն մականունով գետաձին միանշանակ երեխաների և մեծահասակների սիրելին է. նրան տեսնելու համար միշտ հերթեր են գոյանում։
Փիղը մտավ կրկեսը…
Գրանտ կրտսերը, որն այսօր բնակվում է կենդանաբանական այգում, անկասկած, տարբերվում է խելքով և հնարամտությամբ։ Այսպես, նրա և աշխատողների միջև լուռ պայմանավորվածություն կա. նա թույլ կտա իրեն լողացնել, եթե իրեն խնձոր հյուրասիրեն։
Սակայն, եթե կենդանաբանական այգու տնօրինությունը ընկերուհի չգտնի Գրանտի համար, ստիպված կլինեն նրան տեղափոխել այլ կենդանաբանական այգի։
Մասնավորապես, այդպես եղավ մեկ այլ փղի` Գրանտ ավագի հետ։ Բացի այդ, նա առողջական խնդիրներ ուներ, որոնք չհաջողվեց լուծել Երևանում, ուստի նրան տեղափոխեցին Թբիլիսի` բուժվելու։
Թութակներ
Վերջում Sputnik Արմենիան որոշեց զարդարել իր ռեպորտաժը թութակների կյանքից գունագեղ նկարներով։ Ծիածանագույն լորիկետները, կանաչափետուր արան և ժակոն խաղաղ ապրում են վանդակում` բաց երկնքի տակ։ Օրվա մեծ մասը նրանք անցկացնում են` հանգստանալով ճյուղերի վրա, ու նրանց խաղաղ և մարդասեր բնավորության պատճառով որոշակի ժամերի նրանց մոտ թողնում են այցելուների։ Ցանկացողները եզակի հնարավորություն ունեն նրանց մեղրաջուր հյուրասիրել։
Ցավոք, մեկ օրվա շրջանակում անհնար է պատմել Երևանի կենդանաբանական այգու բազմաթիվ զարմանահրաշ բնակիչների մասին։ Այնպես որ, գիշատիչները և այլ բնակիչները սպասում են իրենց հերթին։
