Խաչիկ Չախոյան, Sputnik.
Էդուարդ Մարգարովը հայ եզակի ֆուտբոլիստներից է, որը մասնակցել է ֆուտբոլային համաշխարհային մակարդակի մրցումների: 1966 թվականին նախկին Խորհրդային Միության հավաքականի կազմում Մարգարովը մասնակցել է ֆուտբոլի աշխարհի առաջնությանը: Այդ մրցաշարը համեմատելով Ռուսաստանում անցկացված Կոնֆեդերացիաների գավաթի խաղարկության հետ` Էդուարդ Մարգարովը նշեց, որ նախևառաջ զգացվում էր ժամանակի շունչը: Այն ժամանակ էլ մարդիկ շատ էին հետաքրքրված ֆուտբոլով, բայց այսօր խաղերն անցկացվում են բոլորվին այլ մակարդակի մարզադաշտերում, բացի այդ, ֆուտբոլն է այլ:
«Ռուսաստանը որպես կազմակերպիչ երկիր շատ բարձր մակարդակի մրցաշար անցկացրեց: Կոնֆեդերացիաների գավաթի խաղարկությունում, իհարկե, ավելի քիչ թիմեր են մասնակցում, քան աշխարհի առաջնությունում: Կարելի է ասել` սա աշխարհի փոքր առաջնություն էր: Բայց միևնույնն է` ամեն ինչ շատ լավ էր: Ոչ ստադիոններում, ոչ ստադիոնների մերձակայքում, ոչ էլ քաղաքներում, որտեղ անցկացվեցին խաղերը, ոչ մի միջադեպ չգրանցվեց: Սա նշանակում է, որ Ռուսաստանում ֆուտբոլային տոն էր, ու աշխարհի տարբեր ծայրերից եկած երկրպագուները հիանալի ժամանակ անցկացրին` միաժամանակ աջակցելով իրենց թիմերին»,- նշեց Մարգարովը:
Այն հարցին թե, Ռուսաստանը կկարողանա բարձր մակարդակով կազմակերպել ու անցկացնել նաև աշխարհի 2018 թվականի առաջնությունը, Մարգարովը համոզված նշեց, որ Ռուսաստանն առանց խնդիրների կանցկացնի նաև մունդիալը:
Կոնֆեդերացիաների գավաթի խաղարկությունը փորձ էր բոլոր ծառայությունների համար: Ճիշտ է` 2018 թվականի մունդիալին մասնակցելու են չորս անգամ շատ թիմեր, քան Կոնֆեդերացիաների գավաթի խաղարկությանը:
«Բայց ռուսներն ամեն ինչի պատրաստ են, ու չեմ էլ կասկածում, որ մեկ տարի անց հիանալի մրցաշար է լինելու»,- ասաց Մարգարովը:
Կոնֆեդերացիաների գավաթի խաղարկության եզրափակիչում Գերմանիայի հավաքականը 1:0 հաշվով հաղթեց Չիլիի ընտրանուն ու առաջին անգամ նվաճեց Կոնֆեդերացիաների գավաթը։
Գերմանիայի հաղթանակը գնահատելիս Էդուարդ Մարգարովը բոլոր մասնագետների նման նշեց, որ գերմանացիները ներկայացել էին երիտասարդ կազմով: Թիմի գլխավոր մարզիչ Յոախիմ Լյովը փորձարարական կազմ խաղադաշտ դուրս բերելով` զուգահեռաբար մտածում էր նաև հաղթանակի մասին: Նա մրցաշարի ընթացքում խաղալու հնարավորություն տվեց իր բոլոր ֆուտբոլիստներին: Պարզապես այս մրցումներում Լյովն ապացուցեց, որ Գերմանիայում ֆուտբոլը շատ է զարգացած, ու ինքն արդեն մտածում է ոչ միայն 2018 թվականին աշխարհի առաջնության մասին, այլ ավելի հեռու է նայում նախապատրաստելով ապագա աստղերին:
Անդրադառնալով Ռուսաստանի հավաքականի ելույթին` Մարգարովը նշեց, որ որպես նախկին խորհրդային ֆուտբոլիստ, իհարկե, ուշադրությամբ հետևում էր Ռուսաստանի հավաքականի խաղին։
«Ռուսաստանում շատ լավ ֆուտբոլիստներ կան, բայց կարելի է ասել` ակումբային մակարդակի լավ ֆուտբոլիստներ են: Նրանք դեռ չեն հասցրել հասունանալ հավաքականի համար: Չունեն մեծ փորձ: Հավաքականում չկա առաջատար»,- ասաց Մարգարովը։
Հայ ֆուտբոլիստը նշեց, որ դրա համար ժամանակ է հարկավոր:
