Տարբեր երկրներում այս օրը տարբեր կերպ է նշվում: Կան երկրներ, որտեղ հուլիսի 2-ին մարզական լրագրողների պարգևատրումներ են տեղի ունենում, որոշվում են լավագույն լրագրողները, պարգևներ հանձնվում:Բայց մարզական լրագրողների համար ամեն ինչ մնում է նույնը՝ հետևել մարզական իրադարձություններին, լինել դրանց կիզակետում ու լուսաբանել:
Մարզական լրագրողների համար ամեն ինչ, կարծես թե, նույնն է, ինչ մարզիկների համար. մասնակցել մրցումներին յուրովի, ուրախանալ ու տոնել հաղթանակները, տխրել ու մտածել սխալների մասին պարտությունների ժամանակ: Մեկ բան է անփոփոխ. ինչպես և սպորտում, հաղթանակն ու պարտությունը իրար կողքի են կանգնած:
Սակայն ամեն ինչ այնքան հեշտ ու պարզ չէ, որքան թվում է առաջին հայացքից: Մարզական լրագրողին մրցումները կամ մարզական խոշոր իրադարձությունները լուսաբանելու համար շատ հիմնավոր ու լուրջ գիտելիքներ են հարկավոր: Բացի այդ, յուրաքանչյուր մրցման ժամանակ մարզական լրագրողը սթրես է տանում էմոցիոնալ ֆոնի վրա: Երբեմն, թվում է թե դու ոչ թե հետևում ես խաղին, մենամարտին կամ գոտեմարտին, այլ ինքդ ես մասնակցում:
Շատ մեծ պատասխանատվություն է լուսաբանել մարզական միջոցառումը: Չէ՞ որ սպորտում հաղթում է մեկը, իսկ պարտվողներն ավելի շատ են լինում: Եվ այդ պատճառով, մեծարելով ու փառաբանելով հաղթողին կամ հաղթողներին, պետք է չմոռանալ նաև պարտվողների մասին ու լինել նաև նրանց կողքին:
Ամեն ինչից անկախ մենք (կարծում եմ ինչպես և բոլորը), նախ և առաջ սիրում ենք հաղթել ու լինել հաղթողի դերում: Հայկական հոգեկերտվածքն ուղղակի ստիպում է լինել էմոցիոնալ, հաղթանակի մեծ ձգտումով: Բազմիցս ենք ուրախացել հայկական սպորտի հերոսների նվաճումներով, բայց միևնույն է, դա քիչ է մեզ համար: Մենք էլի ենք ուզում հաղթել ու նվաճել տարբեր տիտղոսներ:
Հայկական սպորտի վերջին ամենախոշոր հաղթանակը Արթուր Ալեքսանյանի օլիմպիական ոսկին էր Ռիո դե Ժանեյրոյում: Անհատական մարզաձևերում (առաջին հերթին՝ հենակետային համարվող մարզաձևերում) հայ մարզիկները շարունակում են յուրաքանչյուր մրցաշարում պայքարել մեդալների համար՝ բարձր պահելով հայկական սպորտի պատիվը: Թիմային մրցաշարերում նույնպես ունեցանք որոշակի հաղթանակներ բասկետբոլում: Իսկ Հենրիխ Մխիթարյանն առաջինն էր հայ ֆուտբոլիստներից, որը դարձավ Եվրոպայի լիգայի հաղթող «Մանչեսթեր Յունայթեդի» կազմում:
Մարզական լրագրողի աշխատանքն, իրականում, անհամեմատ հետաքրքիր է դարձնում հենց մեր մազիկների հաղթանակը կամ հաղթանակները: Եվ այդ առումով նոր հաղթանակներ ցանկանանք հայ մարզիկներին: Իսկ մարզական լրագրողներին շնորհավորենք տոնի կապակցությամբ ու նրանց էլ հաղթանակներ ցանկանանք հաղթանակներն ու պարտությունները լուսաբանելիս:
