ԵՐԵՎԱՆ, 30 հունիսի — Sputnik. ՀՀ արտաքին գործերի նախարար Էդվարդ Նալբանդյանն այսօր լրագրողների հետ զրույցում պատասխանեց Հայաստանի և Ադրբեջանի արտգործնախարարների մակարդակով հաջորդ հանդիպման մասին։ հուլիսին։
«Հնարավոր է` Հայաստանի և Ադրբեջանի արտգործնախարարների հանդիպումը տեղի ունենա հուլիս ամսին»,- ԱԺ-ում ասաց ՀՀ արտաքին գործերի նախարար Էդվարդ Նալբանդյանը։
Այսօր ԱԺ-ում 2016թ. բյուջեի կատարողականի քննարկման ժամանակ Էդվարդ Նալբանդյանը խոսել էր այն մասին, թե ինչ է արվում Արցախին բանակցային սեղան վերադարձնելու ուղղությամբ։
Նրա խոսքով` հարցի պատասխանը նշված է բանակցային աշխատանքային փաստաթղթերում, որոնք պահվում են ԵԱՀԿ-ի գրասենյակում։
«Մի օր կհրապարակվեն այդ բոլոր փաստաթղթերը, և դուք կտեսնեք, որ բոլորի մեջ ասված է՝ ԼՂ ներկայացուցիչները պետք է մասնակցեն բուն խաղաղության պայմանագրի մշակմանն ու բանակցություններին։ Սա, ի դեպ, եռանախագահող երկրների համաձայնությամբ է որոշվել։ Անհնար է որևէ համաձայնության գալ և որոշում կայացնել առանց արցախյան կողմի»,- նշել էր արտգործնախարարը։
Նշենք, որ Էդվարդ Նալբանդյանի և Էլմար Մամեդյարովի վերջին հանդիպումը կայացել էր այս տարվա ապրիլի 28-ին Մոսկվայում։
