ԵՐԵՎԱՆ, 26 հունիսի – Sputnik. Իսրայելի պատգամավորներն ու բիզնեսմենները միջխորհրդարանական բարեկամության խմբի պատգամավոր Տալի Պլոսկովայի գլխավորությամբ Երևանում են գտնվելու երեք օր` սեպտեմբերի 10–ից մինչև 13–ը։
«Այցը տեղի կունենա Հայաստան – Իսրայել հասարակական ֆորումի շրջանակում։ Այսօր մենք ակտիվորեն զբաղվում ենք այդ հարցով։ Ուզում ենք, որ կողմերը ոչ միայն հանդիպեն և զբոսնեն Երևանում, այլ նաև համագործակցության մեջ հետաքրքրված մարդկանց գտնեն»,– Sputnik Արմենիա մուլտիմեդիոն մամուլի կենտրոնում ասաց «Հայաստան – Իսրայել» հասարակական ֆորումի համանախագահ Ալեքսանդր Ցինկերը։
«Հայաստան – Իսրայել» միջխորհրդարանական բարեկամության առաջին խումբը հիմնել է Ցինկերը 1999 թվականին, երբ դեռ Քնեսեթի պատգամավոր էր։ Այդպիսի խումբ ստեղծվել է նաև Հայաստանում։ Պարբերաբար փոխվում էին միջխորհրդարանական խմբերի ղեկավարները, նոր մարդիկ էին գալիս, և կարիք էր առաջանում նորից ճանապարհ հարթել։ Հենց այդ պատճառով առաջացավ հասարակական ֆորում ստեղծելու գաղափարը, որը կկարողանա մշտապես աշխատել։
Մամուլի կենտրոնի մյուս հյուրը` «Հայաստան–Իսրայել» հասարակական ֆորումի համանախագահ, գեներալ–լեյտենանտ Հայկ Քոթանջյանը, ֆորումը չքաղաքականացված հարթակ անվանեց։ Նրա խոսով` ֆորումը պետք է խթանի միջխորհրդարանական բարեկամության խմբի աշխատանքը, նաև հող պատրաստի երկու երկրների մասնագետների և կազմակերպությունների գործակցության համար։
«Այս հարթակն անհրաժեշտ է օրինականացնել։ Իսրայելական կողմից Տալի Պլոսկովան և հայկական կողմից Արտակ Զաքարյանը Երևանում համատեղ նիստի ժամանակ արձանագրություն են ստորագրել ֆորումի ստեղծման վերաբերյալ։ Համանախագահների պաշտոնի համար առաջադրվել է Ցինկերի և իմ` Հայկ Քոթանջյանի թեկնածությունը»,– պարզաբանեց Քոթանջյանը։
Նրա խոսքով՝ ֆորումն իր գործունեությունն իրականացնելու է ոչ պետական կազմակերպությունների միջոցով, որոնք պետք է առաջ տանեն որոշ քաղաքական շահեր, նաև հատուկ երկկողմանի խմբերը, որոնք աշխատելու են միջպետական հարաբերությունների զարգացման ուղղությամբ։
Բավականին կարճ ժամկետում ֆորումն արդեն արդյունքներ ունի։ Մասնավորապես, այն խթանել է երկրու երկրների միջև ուղիղ չվերթի բացումը։ Երևան– Թել Ավիվ – Երևան առաջին կանոնավոր չվերթն իրականացվել է Armenia ավիաընկերության կողմից, մայիսի 17–ին։ Հաջորդ քայլը իսրայելական լրագրողների Հայաստան գալն էր։ Ցինկերի գլխավորությամբ լրագրողների խումբը Հայաստանում երեք օր է անցկացրել մեր երկրի տեսարժան վայրերին ծանոթանալու և Իսրայելում այդ մասին պատմելու նպատակով։
