ԵՐԵՎԱՆ, 26 հունիսի – Sputnik. Սպառազինություն և տեխնիկա մատակարարող երկրների հնգյակի մեջ մտնող Իսրայելի իշխանությունները առաջարկել էին Հայաստանին զենք գնել, սակայն պաշտոնական Երևանին չէր գոհացնում դրա գինը։
«Ժամանակին Հայաստանին առաջարկվել է որոշ քանակի զենք գնել, ինչին նախկին պաշտպանության նախարարը պատասխանել է, որ այն թանկ է։ Խնդրեմ, մենք միշտ պատրաստ ենք, եթե դուք որևէ բան եք ցանկանում»,– Sputnik Արմենիա մուլտիմեդիոն մամուլի կենտրոնում ասաց Քնեսեթի 15–րդ գումարման պատգամավոր Ալեքսանդր Ցինկերը։
Ներկայում Իսրայելը, նրա խոսքով, ռազմական արդյունաբերության վրա աշխատում է տարեկան 5–6 միլիոն դոլար։ Նախկին պատգամավորը անտեղի է համարում հարցերը, որոնք ուղղվում են Իսրայելին` Ադրբեջանին սպառազինություն մատակարարելու հետ կապված։
Այդ առթիվ նա հավելեց, որ Ռուսաստանը Հայաստանի ռազմավարական գործընկերն է, բայց նույնպես Ադրբեջանին զենք է մատակարարում։
Ցինկերը կարծում է, որ հայ-իսրայելական հարաբերություններին նոր շունչ կհաղորդի հուլիսի 25–ին կայանալիք Իսրայելի տարածաշրջանային զարգացման նախարար Ցահիա Նեգվիի գլխավորած պատվիրակության այցը։ Ավելի վաղ Sputnik Արմենիայի թղթակցի հետ զրույցում երկկողմանի համագործակցության տեսակետից նախարարի Հայաստան այցը կարևորել է Հայաստանում Իսրայելի արտակարգ և լիազոր դեսպան Էլիյախու Իերուշալմինը։
Այսօր քննարկման փուլում է Հայաստանում Իսրայելի դեսպանատան բացումը։ Այդ հարցը պարբերաբար բարձրացնում են երկու երկրները, սակայն գործընթացը ձգձգվում է ֆինանսական խնդիրների պատճառով։
Քնեսեթի 15–որդ գումարման պատգամավոր, «Հայաստան – Իսրայել» հասարակական ֆորումի համահիմնադիր Ալեքսանդր Ցինկերը Հայաստան է բերել իսրայելական լրագրողների մի խումբ` երկրի տեսարժան վայրերին ծանոթանալու և Իսրայելում դրանց մասին պատմելու նպատակով։
