ԵՐԵՎԱՆ, 25 հունիսի — Sputnik, Անի Լիպարիտյան. «33-րդ թաղամաս» (Ֆիրդուսու փողոցի վրա` Հանրապետության հրապարակի հարևանությամբ գտնվող շուկայի տարածքը) անունը կրող նախագծի շրջանակում 5.4 հեկտար տարածքում նախատեսվում է 48 մ շառավղով հրապարակ կառուցել: Sputnik Արմենիայի հետ զրույցում այդ մասին ասաց Կառավարությանն առընթեր Քաղաքաշինության պետական կոմիտեի միջազգային համագործակցության և կառուցապատման ներդրումային ծրագրերի վարչության պետի տեղակալ Արտավազդ Թարխանյանը:
Նախագծի համաձայն` շուկան լինելու է Երևանի Հանրապետության հրապարակի հարևանությամբ և պարփակված է լինելու Հանրապետության-Տիգրան Մեծ-Խանջյան- Բուզանդ փողոցներով:
«Այդտեղ նախատեսված է ամբողջական թաղամաս կառուցել: Այս թաղամասի կառուցապատումով կստեղծվի մի յուրօրինակ միջավայր, որն անմիջական կապ կունենա նաև Վերնիսաժի` Բուզանդ և Արամի փողոցների միջև ընկած պուրակի հետ: Շինության մանրակերտն արդեն պատրաստ է, բանակցություններ են տարվում ներդրողների հետ շինարարական աշխատանքները սկսելու համար: Ոլորտի ներդրողներին ու մասնագետներին անհրաժեշտ է համախմբել այդ գաղափարի շուրջ», — ասաց Թարխանյանն` ավելացնելով, որ ըստ նախագծի` ամբողջ թաղամասը մի քանի մասի է բաժանվելու, որոնցից յուրաքանչյուրն ունենալու է անվանում և կոնկրետ գործառույթ:
Թարխանյանի ներկայացրած մանրակերտի վրա սպիտակով նշված են ապագա շենքերը, սևով` հները:
«Պարտադիր պայման է ճարտարապետական հուշարձան հանդիսացող բոլոր շենքերի պահպանումը: Նոր շենքերը կլինեն 5-7 հարկանի: Ամենակարևորը, որ Ֆիրդուսի շուկայի տարածքում կառուցված նոր շենքերը չփակեն հարևան շենքերն ու չաղավաղեն փողոցի տեսքը: Առևտրային տարածքի շուրջ կանաչ գոտի է ստեղծվելու` շատրվաններով և նստարաններով», — ասաց Քաղաքաշինության պետական կոմիտեի ներկայացուցիչը:
Տեղի բնակիչների անորոշ ապագան
Sputnik Արմենիայի նկարահանող խումբն այցելեց Ֆիրդուսի շուկա` անձամբ ուսումնասիրելու տարածքը, որտեղ պատրաստվում են նոր ու գեղեցիկ թաղամաս կառուցել երևանցիների համար: Այնտեղ, որտեղ ավարտվում է շուկան, 3-5 հարկանի տներ են: Բնակիչներն ասում են, որ իրենց տների ապագան դեռ պարզ չէ, սակայն խոսակցություններ կան, որ տները քանդելու են:
Տներից մեկի բնակիչը, որը չցանկացավ ներկայանալ, նշեց, որ ոչինչ դեռ պարզ չէ. ո՛չ նոր շուկայի կառուցման հարցը, ո՛չ էլ իրենց ճակատագիրը:
«Մի քանի ամիս առաջ այստեղ տրակտոր բերեցին: Դեռ շինարարական աշխատանքներ չեն ընթանում, ինչ-որ բան կարծես ուզում են սկսել, մենք ոչինչ չգիտենք: Մեր տունը վթարային չէ, վերջերս եկել են մեզ մոտ, չափել պատերի հաստությունը», — ասաց տղամարդը:
Նրա խոսքով` պաշտոնյաները խոստացել են բնակարան տրամադրել, իսկ իրենց փաստաթղթերում նշել են, որ տունը չորրորդ աստիճանի վթարային է:
Շուկայում առևտուր անող սակավախոս ու ԶԼՄ-ների ներկայացուցիչների հետ շփումից խուսափող մարդիկ էլ միայն նշեցին, որ իրենց միակ ցանկությունն աշխատանքը չկորցնելն է:
Ներդրողի սպասումով
Վերջերս Երևանի քաղաքապետ Տարոն Մարգարյանը առևտրի և սպասարկման վարչության և Կենտրոն վարչական շրջանի ղեկավարներին հանձնարարել էր բանակցություններ տանել Ֆիրդուսի փողոցում գտնվող տոնավաճառների և շուկաների սեփականատերերի հետ` առևտրային կետերը քաղաքի մեկ այլ հատված տեղափոխելու համար:
«Որոշ մարդկանց կողմից Ֆիրդուսի տոնավաճառի առևտրականներին այլ տոնավաճառներ տեղափոխելու գործընթացը փորձ է արվում ներկայացնել որպես մարդկանց օրվա հացից զրկել, մինչդեռ մեր նպատակը բնավ այդ մարդկանց նեղացնելը չէ: Ավելին, մենք փորձում ենք անել առավելագույնը, որ հնարավորին աջակցենք Ֆիրդուսի տոնավաճառի առևտրականներին՝ հաշվի առնելով, որ այդ տարածքում առաջիկայում սկսվելու են կառուցապատման աշխատանքները, և մեր այս համաքաղաքացիների խնդրի կարգավորումը դարձել է առաջնահերթություն: Ընդ որում, թե՛ տոնավաճառի կազմակերպիչները և թե՛ առևտրականները դեռ մեկ տարի առաջ են տեղեկացվել, որ տարածքը վաղ թե ուշ պետք է ազատվի: Ամեն դեպքում, արեք հնարավորը, որ առավելագույնս հաշվի առնվեն տարածքում առևտուր իրականացնող մեր համաքաղաքացիների առաջարկները և ապահովվի խնդրի կարգավորումը», — ասել էր քաղաքապետը։
Քաղաքաշինության պետական կոմիտեի նախագահ Նարեկ Սարգսյանն էլ իր հերթին հայտարարել էր, որ փողոցի առևտրային հատվածի կարգավորումը քաղաքաշինության կոմիտեին չի վերաբերում։
«Ֆիրդուսի փողոցում ներկայում գործող շուկայում շինարարական աշխատանքները ավելի մեծ թափ կստանան աշնանը։ Ֆիրդուսի ամբողջ տարածքը կազմում է 5 հա, և ամբողջ տարածքի 72 տոկոսն իրացված է։ Պետք է կառուցվի երեք ճառագայթող փողոց՝ Տիգրան Մեծի պողոտայից, Խանջյան փողոցից և «Վերնիսաժի» կողմից։ Այս երեքը միանում են և մոտ 85 մ տրամագծով շրջանաձև հրապարակ է դառնում։ Սա Երևանում կլինի իր տեսակի մեջ եզակի, քանի որ նմանատիպ հրապարակ մենք չունենք։ Փողոցները միակողմանի են պտտվում, մեջտեղի հատվածն էլ ամբողջությամբ հետիոտների համար է լինելու։ Հին նախագծերում քաղաքի այդ հատվածը «Հարավային պողոտա» էր կոչվում», — նշեց Սարգսյանը:
Նա նաև ընդգծել էր, որ Քաղաքաշինության կոմիտեն փոխհատուցումների հարցերով չի զբաղվում, դրանով այլ կառույցներ են զբաղվում:
«Որքան ես գիտեմ, այդ հարցով զբաղվում են», — ասել էր կոմիտեի նախագահն ու ավելացրել, որ տեղի բնակիչների հետ համապատասխան պայմանագրեր են կնքվում:
Կառուցապատման ենթակա տարածքի ընդհանուր մակերեսը կկազմի 200 հազար քմ: Նախագծի իրականացման համար շուրջ 3-4 տարի կպահանջվի, իսկ արժեքը կկազմի 300 մլն դոլար:
Ամեն ինչ ներդրողների ձեռքերում է…
