ԵՐԵՎԱՆ, 24 հունիսի — Sputnik. Ժամանակակից արվեստի առաջին տրիենալեն կմեկնարկի հուլիսի 20-ին Իլյա և Էմիլիա Կաբակովների ցուցահանդեսով: Այս մասին հայտնում է The Art Newspaper Russia-ն:
Նոր հայկական տրիենալեն կրում է Standart անվանումը՝ ի պատիվ առաջին համանուն հայկական ավանգարդ հանդեսի, որը բանաստեղծ Եղիշե Չարենցի, ճարտարապետներ Կարո Հալաբյանի և Միքայել Մազմանյանի համագործակցությամբ լույս է տեսել 1924 թվականին Մոսկվայում:
2017 թվականի տրիենալեն ներկայացվելու է «Լեռան անալոգը» խորագրով` ներշնչված ֆրանսիացի սյուռեալիստ գրող և պոետ Ռենե Դոմալի անավարտ վեպից:
Նախագծի գործընկերներն են արվեստի հայկական խորհուրդը, Armenia Art Foundation-ը և Հայաստանում Շվեյցարիայի դեսպանատունը: Որպես գլխավոր համադրող հրավիրված է Ադելինա ֆոն Ֆյուրստենբերգ-Կյուբերյանը, որը Վենետիկի բիենալեի Ոսկե առյուծի դափնեկիր է:
Տրիենալեի անցկացման համար հարթակ են ծառայելու Երևանում և Հայաստանի տարբեր մարզերում գտնվող թանգարանները, Հայաստանի պատմամշակութային հուշարձանները: Հուլիսին Երևանում կբացվի Իլյա և Էմիլիա Կաբակովների ցուցահանդեսը, որը ներառելու է «Մոցարտի երաժշտությունը լսելով՝ խնձոր ձեռք բերելու 20 տարբերակ» ինստալացիան և «Համերգ ճանճի համար» աուդիոինստալացիան:
Երևանում հնարավոր կլինի տեսնել բրազիլահայ լուսանկարիչ Գասպար Գասպարյանի աշխատանքները: Գյումրիում երկու խմբակային նախագիծ կցուցադրվի, որոնք կանցկացվեն Ասլամազյան քույրերի տուն-թանգարանում, Սերգեյ Մերկուրովի տուն-թանգարանում, Ազգային ճարտարապետության թանգարանում: Տրիենալեի երկրորդ փուլը կմեկնարկի սեպտեմբերին. մի քանի նախագծեր էլ կանցկացվեն Սևանա լճում: Բոլոր ցուցահանդեսները գործելու են մինչև ընթացիկ տարվա դեկտեմբերի 31-ը:
