ԵՐԵՎԱՆ, 9 սեպտեմբերի – Sputnik. Հայկական ծրագրի ներկայացումը հաջողությամբ է անցել ժամանակակից արվեստի XIV Ստամբուլի բիենալեում, հայտնում է Initiatives for Development of Armenia բարեգործական հիմնադրամի մամուլի ծառայությունը։
Ստամբուլի 14-րդ բիենալեի շրջանակում Հայկական ծրագրի ներկայացման գաղափարը պատկանում էր բիենալեի համակարգող Քերոլին Քրիստով-Բակարգիևին, ով շնորհանդեսի ժամանակ ընդգծեց Թուրքիայում հարյուր տարի առաջ տեղի ունեցած իրադարձությունների շուրջ քննարկումների կարևորությունն ու արդիականությունը:
Dilijan Art Initiative նախագծի աջակցությամբ Քերոլին Քրիստով-Բակարգիևը միավորել էր ինչպես հայ և թուրք, այնպես էլ հայկական սփյուռքից և ամբողջ աշխարհից նկարիչների, ովքեր իրենց աշխատանքներում արծարծել են Հայոց ցեղասպանության թեման:
«Dilijan Art Initiative-ի աջակցությունը մեզ հնարավորություն տվեց բիենալեում ներկայացնել Հայոց ցեղասպանության սարսափներն ապրած՝ աբստրակտ իմպրեսիոնիզմի հիմնադիր Արշիլ Գորկու, մեդեռնիստ և աբստրակցիոնիզմում նոր ձևեր ստեղծող, լիբանանցի նկարիչ Փոլ Գիրակոսյանի (ում մայրը նույնպես փախել էր արհավիրքներից) գործերը, ինչպես նաև հրաշալի քանդակագործ Սոնա Բալասանյանի աշխատանքներն ու Աննա Բողիգյանի փիլիսոփայական ինստալացիաները», – շնորհանդեսի ժամանակ հայտարարել է Քրիստով-Բակարգիևը։
Dilijan Art Initiative նախագիծը հովանավորել է ոչ միայն հայազգի նկարիչների:
«Մենք նացիոնալիստներ չենք, մենք ինտերնացիոնալիստներ ենք, ընդգրկում ենք ողջ Տիեզերքը: Dilijan Art Initiative նախագծի աջակցությամբ ստեղծվել է Ֆրանսիս Ալիսի «Անիի լռությունը» սև-սպիտակ հրաշալի ֆիլմը, Մայքլ Ռակովիցի և Քրիստինա Բուխի բարդ ինստալացիաները»,-նշել է բիենալեի համակարգողը:
Նկարիչներին, արվեստագետներին և հյուրերին նախագիծը ներկայացրեցին արտ-համակարգող Վադիմ Գրիգորյանն ու IDeA հիմնադրամի համահիմնադիր Վերոնիկա Զոնաբենդը:
«Արվեստի յուրօրինակ լեզուն հասկանալի է ողջ աշխարհի մարդկությանը: Մենք հավատում ենք միջմշակութային երկխոսության կարևորությանը: Դիլիջանում, օրինակ, 2014 թվականից գործում է UWC Dilijan College-ը, որտեղ սովորում են ուսանողներ աշխարհի 64 երկրից, և որն արդեն ինտերնացիոնալ փոխգործակցության հարթակ է: Dilijan Art Initiative նախագիծը համընդհանուր փոխըմբռնման խորացմանն ուղղված ևս մեկ հարթակ կդառնա»,-հայտարարել է Զոնաբենդը:
Ստամբուլի 14-րդ բիենալեն կգործի մինչև 2015 նոյեմբերի 1-ը:
Dilijan Art Initiative-ը IDeA հիմնադրամի նոր նախագիծն է, որի նպատակը Դիլիջան քաղաքի՝ որպես մշակութային և կրթական կենտրոնի զարգացմանը նպաստելն է:
Նախագծի իրականացման մեկնարկը նախատեսվում է 2016 թվականից: Այն ենթադրում է մի շարք հարթակների ստեղծում, որոնք ոգեշնչող ազդեցություն կունենան գիտական և ստեղծագործական հետազոտությունների համար՝ շեշտը դնելով Արևմուտքի և Արևելքի միջմշակութային երկխոսության վրա:
Գործարար և բարեգործ Ռուբեն Վարդանյանի և նրա տիկնոջ՝ Վերոնիկա Զոնաբենդի կողմից հիմնադրված «Հայաստանի զարգացման նախաձեռնություններ» (IDeA) հիմնադրամն իրականացնում է երկրի սոցիալ-տնտեսական զարգացմանն ուղղված երկարաժամկետ ծրագրեր, որոնք կօգնեն գոյատևումից անցում կատարել դեպի բարեկեցություն:
IDeA աջակցում է Հայաստանի սոցիալական ձեռներեցության զարգացմանը` ոչ առևտրային նախագծերում երկարաժամկետ ներդումներ կատարելով և ապահովելով դրանց կայուն զարգացումը։
Հայկական ծրագիրը ցնցեց Ստամբուլի XIV բիենալեի այցելուներին
© Sputnik / Антон Денисов
/ Բաժանորդագրվել
Dilijan Art Initiative նախագծի աջակցությամբ Քերոլին Քրիստով-Բակարգիևը միավորել էր նկարիչների, ովքեր իրենց աշխատանքներում արծարծել են Հայոց ցեղասպանության թեման
