ԵՐԵՎԱՆ, 23 հունիսի —Sputnik. Հովհաննես Բաչկովն իր ելույթները մրցումներում սկսեց 1/8 եզրափակչից: Մեր բռնցքամարտիկն առավելության հասավ մոլդավացի Դմիտրի Գալագոտի նկատմամբ: Քառորդ եզրափակչում հայ բռնցքամարտիկն, իր առավելությունը դրսևորելով հունգարացի Ռիխարդ Կովաչի նկատմամբ, դուրս եկավ կիսաեզրափակիչ ու ապահովեց բրոնզե մեդալ:
Բացի բրոնզե մեդալից, Բաչկովն արդեն ապահովել էր նաև աշխարհի առաջնության ուղեգիրը: Բայց հայ բռնցքամարտիկն այսքանով չի բավարարվում ու այսօր լուրջ հայտ է ներկայացրել Եվրոպայի չեմպիոնի կոչմանն արժանանալու համար:
Կիսաեզրափակիչում Հովհաննեսը դժվարին մենամարտում կարողացավ ավելի դիպուկ ու արագաշարժ լինել լեհ Մաթեուշ Պոլսկիից, որին պարտվել էր Եվրոպայի առաջնությանը նախորդած միջազգային մրցաշարում:
Այսպիսով` Հովհաննես Բաչկովը եզրափակիչում է, որտեղ նրա մրցակիցն է լինելու անգլիացի Լյուկ ՄըքՄորմեկը:
