ԵՐԵՎԱՆ, 23 հունիսի – Sputnik, Խաչիկ Չախոյան. Զինեդին Զիդանը ֆուտբոլիստի իր կարիերան սկսել է ֆրանսիական «Կանն» թիմում, այնուհետև հանդես եկել «Բորդոյի» կազմում: Բայց համաշխարհային փառք ու ճանաչում Զիդանը ձեռք բերեց խաղալով նախ «Յուվենտուսի», ապա արքայական «Ռեալի» կազմերում: Իհարկե, զուգահեռաբար Զիդանը Ֆրանսիայի ազգային հավաքականի կազմում նույնպես հաջողություններ էր կերտում ու տիտղոսներ նվաճում:
Քիչ ֆուտբոլիստներ կան, որոնք Զիզույի նման երկրպագուների կողմից ընդունվել են որպես ֆուտբոլային աստղ: Բայց միայն երկրպագուները չեն, որ գնահատել են ֆրանսիացու խաղն ու վարպետությունը: Ֆուտբոլային մասնագետները նույնպես արժանի գնահատականի են արժանացրել Զիդանի խաղը: Զիդանը երեք անգամ (1998, 2000 և 2003 թվականներին) ճանաչվել է աշխարհի լավագույն ֆուտբոլիստ: 1998 թվականին «Ոսկե գնդակի» դափնեկիր էր` որպես Եվրոպայի լավագույն ֆուտբոլիստ: 2004 թվականին ՈւԵՖԱ-ի կողմից ճանաչվել է որպես վերջին 50 տարիների լավագույն ֆուտբոլիստ: Իսկ 2016 թվականին France Football-ի վարկածով ճանաչվել է ֆուտբոլի պատմության մեջ Ֆրանսիայի լավագույն ֆուտբոլիստ:
Հենց Զիդանի մեծ վարպետության շնորհիվ Ֆրանսիայի ազգային հավաքականը 1998 թվականին առաջին անգամ կարողացավ դառնալ աշխարհի չեմպիոն: Եզրափակչի առաջին խաղակեսում Զիդանի խփած երկու գնդակները ապահովեցին Ֆրանսիայի ընտրանու հաղթանակն աշխարհի գործող չեմպիոն Բրազիլիայի հավաքականի նկատմամբ:
Աշխարհի կրկնակի չեմպիոն դառնալու ճանապարհին էլ Զիդանը Ֆրանսիայի հավաքականի կազմում գլխավոր դերակատարներից մեկն էր: Եզրափակչում Զիդանը իտալացի Մատերացիին հարվածելու պատճառով հեռացվեց խաղադաշտից ու ֆրանսիացիները պարտվեցին հետխաղյա 11 մետրանոց հարվածներով: Այդ խաղից հետո եղան մարդիկ, որոնք քննադատեցին Զիդանին ոչ սպորտային պահվածքի ու իր թիմի հաղթանակը կասկածի տակ դնելու համար: Բայց շատերն արդարացրին տաքարյուն ֆրանսիացուն (ինչպես պարզվեց հետո Զիդանը իտալացուն հարվածել էր իր ընտանիքին հայհոյելու համար):
2000 թվականին Զիդանը Ֆրանսիայի հավաքականի կազմում նվաճեց նաև Եվրոպայի չեմպիոնի կոչումը: Իսկ ակումբային ֆուտբոլում Զիզուն նախ փայլեց Իտալիայում, որտեղ նա երկու անգամ նվաճեց «Ա» սերիայի չեմպիոնի կոչումը, դարձավ Եվրոպայի սուպերգավաթակիր ու հաղթանակ տարավ միջմայրցամաքային գավաթի խաղարկությունում:
2001 թվականին, այն ժամանակ ռեկորդային 75 միլիոն եվրոյով, «Ռեալը» գնեց Զիդանի տրանսֆերը, ու մինչ օրս էլ արքայական ակումբը վստահում է Զիդան ֆուտբոլիստին ու մարզչին: «Ռեալի» երկրպագուները երբեք չեն մոռանա Զիդանի խփած ֆանտաստիկ գնդակը Չեմպիոնների լիգայի եզրափակիչում 2002 թվականին: Զիդանը տիտղոս բերեց իսպանական թիմին` ապահովելով հաղթանակը գերմանական «Բայերի» նկատմամբ 2:1 հաշվով:
2006 թվականին, ավարտելով ֆուտբոլային կարիերան, Զիդանն անցավ մարզչական աշխատանքի «Ռեալի» կազմում ու երկու տարի անընդմեջ դարձավ Չեմպիոնների լիգայի հաղթող` առաջին անգամ մարզիչների մեջ հասնելով նման հաջողության: Ֆրանսիացին կարողացավ իր փորձն ու վարպետությունը փոխանցել «Ռեալի» շատ ֆուտբոլիստների: Միաժամանակ, օգտագործելով իր թիմի առաջատարների վարպետությունը, Զիդանը երիտասարդ ֆուտբոլիստներին վստահեց «Ռեալի» կազմում խաղալն`այդպիսով կերտելով նաև «Ռեալի» ապագան:
Ներկայումս Զիդանն իր մարզչական կարիերայի գագաթնակետին է: 2016-17 թվականների Չեմպիոնների լիգայի եզրափակիչից առաջ շատերը նշում էին, որ «Յուվենտուսը» հաղթանակի է հասնելու` իր հիանալի խաղի շնորհիվ: Բայց եզրափակիչի երկրորդ խաղակեսում խաղադաշտում «Ռեալը» հիանալի էր` իր անփոխարինելի մարզիչ Զինեդին Զիդանի հետ, ինչ էլ ապահովեց սերուցքայինների հաղթանակը` 4:1 հաշվով:
