ԵՐԵՎԱՆ, 23 հունիսի – Sputnik. Միջազգային չափանիշներով կառուցված հատուկ պատը մեզ կօգնի ապագա օլիմպիականներ պատրաստել, Sputnik Արմենիայի հետ զրույցում ասաց Ալպինիզմի և լեռնային տուրիզմի հայկական ֆեդերացիայի փոխնախագահ Սուրեն Դանիելյանը։
«Ալպինիզմի և լեռնային տուրիզմի հայկական ֆեդերացիան անմիջական մասնակցություն է ունեցել տարածաշրջանում եզակի կառույցի շինարարության մեջ։ Պատի նախագծման ժամանակ հաշվի են առել միջազգային նորմերն ու պահանջները։ Մենք պատրաստվում ենք տարբեր մրցումներ անցկացնել, այդ թվում` միջազգային։ Եթե մագլցման պատը չհամապատասխաներ կոնկրետ միջազգային նորմերին, ապա այլ երկրներից Հայաստան չէին գա», – ասաց Դանիելյանը` հավելելով, որ մարզիչներ են հավաքվելու հատուկ երեխաների հետ աշխատելու համար։
Օր ու գիշեր մագլցման պատի վրա
Ալպինիզմի և լեռնային տուրիզմի ֆեդերացիայի վարչության անդամ, ԵՊՀ սպորտային վերելքների ակումբի ղեկավար Սուրեն Ստեփանյանը Sputnik Արմենիայի հետ զրույցում նշեց, որ ժայռամագլցման երեք տեսակ կա` մագլցում բարդության վրա, մագլցում արագության վրա և բոուլդերինգ։
«Արագության մագլցման պատն ամբողջ աշխարհում նույն չափանիշներով է կառուցվում, բարձրությունը 16 մետր է։ Մեր 12–մետրանոց պատը նախատեսված է այն մարդկանց համար, որոնք ուզում են բարդություններ հաղթահարել։ Չորս արտասահմանցի մասնագետ է աշխատել, մեկ ամիս շարունակ հավաքում էին այս պատը` բոլոր նորմերի համաձայն», – նշել Ստեփանյանը։
Այս տարվա դեկտեմբերից գործող պատն ի սկզբանե կառուցվել է ԵՊՀ ուսանողների համար, բայց այսօր պրոֆեսիոնալ ժայռամագլցողները կընտրեն այն խմբերին, որոնք կկարողանան մարզվել այստեղ։
«Մասնագետների խմբի հետ մենք կքննարկենք` ինչպես է կարելի պատն օգտագործել մարզիկների պարապմունքների համար։ Նախկինում ընդունված էր համարել, որ ժայռամագլցմամբ կարելի է զբաղվել 14 տարեկանից, բայց այսօր տարիքային շեմը հասել է ութի։ Ես շատ էի ուզում, որ Հայաստանում այսպիսի պատ լինի։ Հասա նրան, որ պատը ոչ թե բացօթյա լինի, այլ` փակ տարածքում, քանի որ հակառակ դեպքում հնարավոր կլիներ մարզվել տարին միայն վեց ամիս, ինչը դրական արդյունքներ չէր տա», – ասաց Ստեփանյանը։
Նա նշեց, որ ԵՊՀ ռեկտոր Արամ Սիմոնյանը պատրաստակամությամբ է ընդունել այս առաջարկը` տարածք հատկացնելով մագլցման պատի համար։
Ստեփանյանի խոսքով` կպատրաստվենք Օլիմպիական խաղերին (ժայռամագլցումը ներառված է Տոկիո –2020 օլիմպիական խաղերի ծրագրում – խմբ.), եթե ոչ երկու տարուց, ապա մի քանի տարուց ` հաստատ։
Ապագան երեխաների ձեռքերում է
Լեռնագնաց Էվելինա Դանիելյանը նշեց, որ սիրում է սարերը և մանկուց վերելքներ է իրականացնում։
«Ես 14 տարեկան եմ, շատ եմ սիրում լեռները… Այս պատը շատ բարդ է, բայց երբ ստիպում ես քեզ հաղթահարել այն, ուժերդ ավելանում են։ Պատրաստ եմ ապագայում մասնակցել Օլիմպիադային։ Եթե անգամ ես չգնամ, ապա իմ խմբից որևէ մեկը կմասնակցի օլիմպիական խաղերին», – ասաց Էվելինան։
Նրա խոսքով` երեխաներին ու պատանիներին մարզում են պրոֆեսիոնալները։
Լեռնագնացությունն ու սպորտային վերելքները ԵՊՀ–ի ներսում կզարգանան Ալպինիզմի և լեռնային տուրիզմի հայկական ֆեդերացիայի և Իրանի Իսլամական Հանրապետության ալպինիզմի ֆեդերացիայի համագործակցության շնորհիվ։
