ԵՐԵՎԱՆ, 23 Հունիս — Sputnik. Հայաստանում էլեկտրական ավտոմեքենա ներկրողներից ու շահագործողներից բնապահպանական վճար է գանձվում։ Այդ մասին Sputnik Արմենիայի հետ զրույցում ասաց ավտոմեքենաների ներկրմամբ զբաղվող «Ավտո Շիփինգ» ընկերության տնօրեն Էմիլ Մելքոնյանը։ Նրա խոսքով՝ վերջերս իրենց կազմակերպության ներկրած մի քանի էլեկտրագնացների մաքսազերծման գործընթացում իրենցից բնապահպանական վճարներ են գանձել։
Ավելի ուշ նույն խնդրի հետ մեր զրուցակիցը բախվել է նաև ավտոմեքենայի ապահովագրության և պարտադիր տարեկան տեխզննման ժամանակ։
«Երբ ես բանկի աշխատակցուհուն ասացի, որ սա էկոլոգիապես մաքուր էլեկտրական ավտոմեքենա է, նա հասկացավ, թե ինչի մասին է խոսքը, բայց ասաց, որ իրենց ծրագրում նման ավտոմեքենաների համար կետ նախատեսված չէ և անգամ ցույց տվեց ինձ համակարգչի վրա` ծրագիրը նախատեսում է միայն վառելիքով աշխատող ավտոմեքենաների տեսակներ։ Իսկ առանց այդ սյունակում համապատասխան նշում անելու ծրագիրը թույլ չի տալիս տպել պայմանագիրը։ Այս նույն ծրագրով են աշխատում նաև հայաստանյան մնացած բոլոր բանկերը»,– պատմեց Էմիլ Մելքոնյանը։
Նրա խոսքով, ավտոմեքենայի տեխզննության ժամանակ էլ մասնագետները փորձել են CO գազի արտանետումների ծավալը չափել, բայց, քանի որ մեքենայի խլացուցիչը չեն գտել, հրաժարվել են այդ մտադրությունից։
Հայաստանում այսօր էլեկտրական ավտոմեքենաների թիվը շատ փոքր է։ Հայաստանի ավտոմոբիլային ֆեդերացիայի անդամ, գործող մարզիկ Էդուարդ Եղյանի տեղեկություններով՝ 3-5 մասնավոր ավտոմեքենաներ, հիմնականում` Tesla մակնիշի։ Վերջերս Հայաստան են ներկրվել նաև ավելի էժան Nisan Leaf մակնիշի մի քանի ավտոմեքենա, առաջիկայում սպասվում է ևս 7 ավտոմեքենայի ներկրում։
Էդուարդ Եղյանի խոսքով՝ այս ավելի էժան էլեկտրագնացների պահանջարկը Հայաստանում կա, հատկապես, որ դրանք նաև չափազանց քիչ ծախսատար են։
Մարտկոցի ամբողջական լիցքավորման համար ծախսվում է ընդամենը 24 ԿՎտ էլեկտրաէներգիա։ Բայց մեկ լիցքավորմամբ այն կարող է անցնել 130-160 կմ ճանապարհ։ 220 վոլտ հոսանքով լիցքավորումը տևում է 3-4 ժամ, իսկ եռաֆազ հոսանքի առկայության դեպքում, առավելագույնը մինչև 30 րոպե։
Ֆեդերացիայում վստահ են, որ եթե մաքսազերծման ընթացքում հաշվի առնվի մեքենայի էկոլոգիական լինելու հանգամանքը, ինչն այսօր չի արվում, մաքսազերծումը ոչ միայն կպարզեցվի, այլև կէժանանա։
«Մենք մուծում ենք մեր ավանդական մաքսազերծման արժեքը, որի մեջ հաշվառվում է նաև բնապահպանական վճարը, որովհետև պատասխանատուները կա՛մ տեղյակ չեն, կա՛մ չունենք էլեկտրամոբիլների ցանկը»,– ասաց ավտոմոբիլային ֆեդերացիայի նախագահ Էդուարդ Եղյանը։
Էլեկտրական ավտոմեքենաների տերերի համար մեծ խնդիր է նաև ավտոմեքենայի մարտկոցի լիցքավորումը։ Էդուարդ Եղյանի տվյալներով, մեր երկրում այսօր էլեկտրամոբիլների լիցքավորման 5 կետ կա, որոնցից 3-ը` Երևանում, 2-ը՝ հարակից մարզերում։
Ավտոմոբիլային ֆեդերացիան մտադիր է պաշտոնական նամակով դիմել վարչապետին` հանրապետության լցակայաններում առայժմ փոքրաթիվ, բայց ավելացման միտում ունեցող էլեկտրական ավտոմեքենաների լիցքավորման ապարատներ տեղադրելու առաջարկով։
