Լաուրա Սարգսյան, Sputnik.
Շուտով Հայաստանը կկարողանա ամբողջությամբ անցում կատարել էլեկտրաէներգիայի այլընտրանքային աղբյուրների։ Այս մասին բազմաթիվ անգամ խոսել են երկրի բարձրաստիճան պաշտոնյաներն ու այդ ոլորտի մասնագետները, քանի որ Հայաստանն ունի բոլոր անհրաժեշտ աշխարհագրական ու եղանակային պայմանները։
Մեծ Մասրիկում 50 ՄՎտ հզորությամբ արևային կայանի կառուցումը խոշոր նախագիծ է հայկական էներգետիկայի պատմության մեջ։ Բարեհաջող մեկնարկի դեպքում նախատեսվում է արևային կայաններ կառուցել նաև Թալինում, Գագարինում, Դաշտադեմում և Մերձավանում։
«Շուրջ 40 արտասահմանյան ընկերություն` շվեյցարականից մինչև հնդկական, պատրաստ են ներդրում կատարել այդ ծրագրի իրագործման համար։ Կայանի կառուցման համար մրցույթը կանցկացվի 2017 թվականի ապրիլին։ Արևային կայանը Մասրիկում 50 մլն դոլար կարժենա», — Sputnik Արմենիայի թղթակցի հետ զրույցում ասաց Հայաստանի վերականգնվող էներգետիկայի և էներգախնայողության հիմնադրամի տնօրեն Թամարա Բաբայանը։
Նախագծի դրական արդյունքները միանգամից ի հայտ չեն գա, սակայն հեռանկարում երկիրը մասնակի, այնուհետև նաև ամբողջությամբ անկախ կդառնա էներգետիկ ոլորտում, կբացվեն մի շարք աշխատատեղեր, ինչպես նաև կապահովվի բնապահպանական անվտանգությունը։
50 ՄՎտ հզորությամբ կայանի կառուցման համար շուրջ ութ ամիս է անհրաժեշտ։ Լավագույն դեպքում շինարարությունը կսկսվի հաջորդ տարի։
Հայաստանում այլընտրանքային էներգիա ստանալու մասին խոսակցություններն առաջին անգամ շրջանառվեցին 2006 թվականին։ 2014 թվականին նախագիծը պետական աջակցություն ստացավ և հաստատվեց Հայաստանի կառավարության կողմից։
Կառավարությունը նախատեսում է մինչև 2020 թ-ը 38 տոկոսով կրճատել էներգիայի սպառումը և դրա հետ կապված` էներգետիկ ծախսերը։ Հայաստանում ստեղծված են բոլոր պայմանները արևային էլեկտրակայաններ տեղադրելու համար։ Ոչ միայն արտոնագիր չի պահանջվում, այլ նաև ամբողջ գործընթացն ազատված է հարկերից։ Նաև ստեղծված են բոլոր պայմաններն այդ ոլորտում ներդրումներ անելու համար։
Նախագիծը դեկտեմբերի 29-ին հաստատել է Հայաստանի կառավարությունը, տրամադրվել է 129 միլիոն դոլար։
Այս և այլ հարցեր կքննարկվեն «Էլեկտրաէներգիայի շաբաթ 2017» խոշոր միջազգային էներգետիկ միջոցառման ժամանակ, որին կմասնակցի արտասահմանյան ընկերությունների մոտ 300 ներկայացուցիչ։
