ԵՐԵՎԱՆ, 23 հունիսի — Sputnik. ՀՀ կրթության գիտության նախարարությունն անդրադարձել է վերջին շրջանում քննարկվող թեմային, որի համաձայն` Իսրայելի պետությունը չի երաշխավորում Հայաստանում բժշկական կրթություն ստացած շրջանավարտների աշխատանք գտնելու հնարավորությունը։
«Հաշվի առնելով վերջին շրջանում հանրային հնչեղություն ստացած այն փաստը, որ Իսրայելի առողջապահության նախարարության պաշտոնական կայքէջում հրապարակվել է տեղեկատվություն, համաձայն որի` Իսրայելի պետությունը չի երաշխավորում Հայաստանում բժշկական կրթություն ստացած շրջանավարտների աշխատանք գտնելու հնարավորությունը, ՀՀ կրթության և գիտության նախարարությունը հայտնում է, որ համապատասխան գրություն է ուղարկվել ՀՀ արտաքին գործերի նախարարություն»,- հայտնում են ԿԳՆ մամուլի ծառայությունից։
ԱԳՆ-ին ուղարկված գրության մեջ նշված է. «Հաշվի առնելով այն հանգամանքը, որ նման հրապարակումները ստվեր են գցում ոչ միայն Հայաստանի կրթական համակարգի, այլ նաև ողջ պետության միջազգային հեղինակության վրա, խնդրում ենք Ձեր միջնորդությունը`Իսրայելի համապատասխան կառույցներից խնդրի վերաբերյալ հնարավորինս մանրամասն, այդ թվում` բուհերի, դիպլոմների, շրջանավարտների ինքնության մասին տեղեկություններ ստանալու վերաբերյալ»:
ԿԳՆ-ն հայտնում է, որ համապատասխան տեղեկատվություն ստանալուց հետո ՀՀ կրթության և գիտության նախարարությունը հետամուտ է լինելու խնդրի վերաբերյալ ամբողջական և բազմակողմանի քննության անցկացմանը:
Նշենք, որ ավելի վաղ ԵՊԲՀ մամուլի պատասխանատու Շուշան Դանիելյանը Sputnik Արմենիային հայտնել էր, որ տարածված տեղեկությունները ոչ մի կապ չունեն տասնյակ տարիների ավանդույթներ ունեցող Երևանի պետական բժշկական համալսարանի հետ։
