ԵՐԵՎԱՆ, 22 հունիսի-Sputnik. Իսրայելի առողջապահության նախարարությունը դիմել է ոստիկանություն՝ ահազանգով, որ տեղացի ատամնաբույժներն աշխատում են հայկական կեղծ դիպլոմներով: Այս մասին լուրը հայտնվել է իսրայելական «Դեմարկեր» պարբերականում: Խնդրի վերաբերյալ պարզաբանում ստանալու համար Sputnik Արմենիան դիմեց ԵՊԲՀ մամուլի պատասխանատու Շուշան Դանիելյանին: Նա նշեց, որ տարածված տեղեկությունները ոչ մի աղերս չունեն տասնյակ տարիների ավանդույթներ ունեցող Երևանի պետական բժշկական համալսարանի հետ:
«Մեր բուհի շրաջանավարտներն այօր աշխարհի տարբեր անկյուններում, ամենահեղինակավոր առողջապահական կազմակերպություններում առաջատար պաշտոններ են զբաղեցնում: Իսրայելի առողջապահության նախարարության հայտարարությունը ոչ մի կապ չունի հարյուրամյա ճանապարհ անցած ԵՊԲՀ-ի հետ»,-ասաց Շուշան Դանիելյանը:
Նա տեղեկացերց, որ Մասնագիտական կրթության որակի ապահովման ազգային ինստիտուտը ինստիտուցիոնալ հավատարմագրում է շնորհել միայն ԵՊԲՀ-ին:
«Այս հանգամանքը ևս մեկ անգամ փաստում է, որ ԵՊԲՀ-ի ուսումնական ծրագրերը բժշկական բոլոր մասնագիտությունների գծով և դասավանդման լեզուներով համապատասխանում են միջազգային ստանդարտներին: Հավելեմ նաև, որ վերջին վեց տարիների ընթացքում ԵՊԲՀ-ն ավարտել է տասը իսրայելցի ուսանող: Նրանց ապագա գործունեության հետ կապված որևէ բողոք, դժգոհություն բուհը չի ստացել»,-ասաց նա:
Վերջում նա տեղեկացրեց, որ ԵՊԲՀ շրջանավարտներն աշխատում են աշխարհի ավելի քան 40 երկրներում: Այս պահին 26 երկրից 1700 ուսանող, այդ թվում նաև Իսրայելից, Հայաստանում ստանում է բժշկական կրթություն:
