ԵՐԵՎԱՆ, 22 հունիսի – Sputnik, Լաուրա Սարգսյան. Armenia ավիաընկերությունը Երևան – Սալոնիկ – Երևան սեզոնային չվերթ է գործարկել. Առաջին թռիչքը նախատեսված է այսօր` հունիսի 22–ին։ Armenia–ի ինքնաթիռները Հունաստանի ուղղությամբ թռիչքներ են իրականացնելու շաբաթական մեկ անգամ` հինգշաբթի օրերին։
«Կանոնավոր չվերթը գործելու է ամառվա ընթացքում։ Ինքնաթիռները մեկնելու են «Զվարթնոց» միջազգային օդանավակայանից ժամը 18:00–ին», – Sputnik Արմենիայի հետ զրույցում ասաց «Armenia» ավիաընկերության փոխտնօրեն Գևորգ Խաչատրյանը։
Նրա խոսքով` ավիատոմսերի գները սկսում են 184 եվրոյից (մի ուղղությամբ)։ Արժեքի մեջ ներառված են ուղեբեռը, ձեռքի բեռը և սնունդը։ Ինչպես նշեց Խաչատրյանը, վերջին շրջանում զգալիորեն աճել է դեպի Հունաստան ուղևորությունների պահանջարկը։ Ամռանը Armenia–ն նաև կիրականացնի մի շարք չարտերային չվերթեր դեպի Ռոդոս կղզի և այլն։
Առաջիկայում ավիաընկերությունը ևս մեկ ուղղություն կառաջարկի։ Հուլիսին նախատեսվում է չարտերային չվերթեր իրականացնել Իսպանիայի (Բարսելոնա) և Իրաքի ուղղությամբ։ «Armenia»-ն ներկա փուլում չվերթեր է իրականացնում նաև դեպի Վորոնեժ, Մինվոդի, Թել Ավիվ:
«Armenia» ավիաընկերությունն ունի երկու ինքնաթիռ` Boeing 737-500 և Boeing 737-700։ Անձնակազմում կա 53 աշխատակից։ Ավիաընկերության հիմնադիրներն են Աշոտ Թորոսյանը (51 տոկոս բաժնետոմս), Թամազ Գաիաշվիլին (24 տոկոս) և Ռոբերտ Օգանեսյանը (25 տոկոս):
Հայաստանն ազգային ավիափոխադրողից զրկվել է 2013 թվականին` «Արմավիա» ընկերության սնանկացումից հետո: Այնուհետև ավիաշուկայում հայտնվել է AirArmenia ավիաընկերությունը, որն էլ 2014 թվականի հոկտեմբերին, հայտնվելով սնանկացման եզրին, դադարեցրել է թռիչքները։ Այժմ հայկական շուկայում երկու հայկական ավիափոխադրող է գործում` «Armenia» և «Տարոն Ավիա»:
