ԵՐԵՎԱՆ, 17 հունիսի — Sputnik, Լաուրա Սարգսյան. «Armenia» ավիաընկերությունը հուլիսից կսկսի չվերթեր իրականացնել Երևանից Բեյրութ շաբաթական երեք անգամ: Մայիս և ապրիլ ամիսներին Երևանից Բեյրութ ավիաընկերությունը թռիչք իրականացնում էր շաբաթական միայն մեկ անգամ:
«Աստիճանաբար աճեց պահանջարկը Լիբանանի բնակչության շարքում: Այսօր մենք դեպի Բեյրութ թռիչքներն իրականացնում ենք երկուշաբթի և ուրբաթ: Երեք անգամ շաբաթական կմեկնենք, ընդհուպ մինչև զբոսաշրջային սեզոնի ավարտը»,- Sputnik Արմենիայի թղթակցի հետ զրույցում ասաց «Armenia» ավիաընկերության տնօրենի տեղակալ Գևորգ Խաչատրյանը:
Դա զարմանալի չէ, քանի որ Լիբանանում բնակվում է աշխարհի ամենամեծ հայ համայնքը: Ուղիղ չվերթի գործարկումից հետո Լիբանանից զբոսաշրջիկների հոսքն ավելացավ: Սկսեցին թռնել ոչ միայն էթնիկ հայերը, այլև արաբները: Շատերը Հայաստան են գալիս ոչ միայն հանգստանալու համար, այլև բուժվելու նպատակով:
Լիբանանն իր հերթին հայերի համար դեռ քիչ ծանոթ է: Նա, ով գոնե մեկ անգամ եղել է Բեյրութում, այլևս Դուբայ չի ցանկանում մեկնել: Այդ պատճառով ավիաընկերությունը հավաքել է Հայաստանի խոշոր տուրօպերատորների ներկայացուցիչներին՝ ծանոթացնելու Լիբանանի զբոսաշրջային առավելությունների հետ:
«Այսօր մենք հավաքել ենք տուրօպերատորիներին՝ պատմելու Լիբանանի բոլոր դրական կողմերի մասին, նրա համար, որ իրենք էլ իրենց հերթին այդ գիտելիքները փոխանցեն բնակչությանը»,- ասաց Խաչատրյանը:
Նրա խոսքով`կփոխվի նաև սակագնային քաղաքականությունը: Եթե այսօր Երևան-Բեյրութ-Երևան տոմսի արժեքը 350 դոլար է, տուրփաթեթ գնելու պարագայում ավիատոմսը զգալիորեն ավելի մատչելի կլինի:
Ավիափոխադրողը Բեյրութում արդեն բացել է իր ներկայացուցչությունը: «Armenia»-ն ներկա փուլում չվերթեր է իրականացնում նաև դեպի Վորոնեժ, Մինվդոի, Թել Ավիվ, ինչպես նաև չարտերային չվերթեր ունի:
«Armenia» ավիաընկերությունն ունի երկու ինքնաթիռ` Boeing 737-500 և Boeing 737-700։ Անձնակազմում կա 53 աշխատակից։ Ավիաընկերության հիմնադիրներն են Աշոտ Թորոսյանը (51 տոկոս բաժնետոմս), Թամազ Գաիաշվիլին (24 տոկոս) և Ռոբերտ Օգանեսյանը (25 տոկոս):
Հայաստանն ազգային ավիափոխադրողից զրկվել է 2013 թվականին` «Արմավիա» ընկերության սնանկացումից հետո: Այնուհետև, ավիաշուկայում հայտնվել է AirArmenia ավիաընկերությունը, որն էլ 2014 թվականի հոկտեմբերին, հայտնվելով սնանկացման եզրին, դադարեցրել է թռիչքները։
Այժմ հայկական շուկայում երկու հայկական ավիափոխադրող է գործում` «Armenia» և «Տարոն Ավիա»:
