Եվրոպայի կենտրոնում տոնել են ՀԱՊԿ–ի ստեղծումը

ԵՐԵՎԱՆ, 21 հունիսի – Sputnik. ՀԱՊԿ–ին կից ՌԴ ներկայացուցչությունը նշել է Հավաքական անվտանգության պայմանագրի ստորագրման 25–ամյակն ու ՀԱՊԿ–ի ստեղծման 15–ամյակը։ Այս մասին հայտնում է ՀԱՊԿ–ի մամուլի ծառայությունը։

Այդ կապակցությամբ կազմակերպված ընդունելությանը ներկա են եղել դիվանագիտական առաքելությունների նախագահները, ՀԱՊԿ անդամ երկրների մշտական ներկայացուցիչները, ՀԱՊԿ քարտուղարության ղեկավարները, ՀԱՊԿ–ին կից միջազգային կազմակերպությունների ներկայացուցիչները (ՄԱԿ, ՄԱԳԱՏԷ և այլն)։

Միջոցառման ընթացքում ՀԱՊԿ–ի հոբելյանին նվիրված վավերագրական ֆիլմ և լուսանկարների շարք է ցուցադրվել։

Ընդունելությանը ողջույնի խոսքով ելույթ են ունեցել գլխավոր քարտուղարի տեղակալ Վալերի Սեմերիկովը, ԵԱՀԿ-ում Ռուսաստանի մշտական ներկայացուցիչ Ալեքսանդր Լուկաշևիչը, ԵԱՀԿ-ում Բելառուսի մշտական ներկայացուցիչ Ռոման Ռոմանովսկին։

Նրանք պատմել են ՀԱՊԿ–ի ստեղծման, կազմակերպության կայացման փուլերի, նոր և դասական սպառնալիքների և մարտահրավերների դեմ պայքարելու ներուժի մասին։

Նշվել է ՀԱՊԿ–ի կարևորությունը կազմակերպության պատասխանատվության տակ գտնվող տարածաշրջանում անվտանգություն և կայունություն ապահովելու հարցում։ Առանձնահատուկ ուշադրություն է դարձվել կազմակերպության և ԵԱՀԿ–ի, ինչպես նաև  միջազգային այլ կազմակերպությունների հետ համագործակցությանը` Եվրասիական տարածքում անվտանգության ապահովման հետ կապված գործունեության բոլոր ուղղություններով։