ԵՐԵՎԱՆ, 21 հունիսի — Sputnik, Լաուրա Սարգսյան. Հայ առաքելական եկեղեցու Վրաստանի թեմի առաջնորդի օգնական Խորեն վարդապետ Հովհաննիսյանը Ամենայն Հայոց կաթողիկոս Գարեգին Բ–ի կարգադրությամբ զրկվել է հոգևոր աստիճանից։
«Համապատասխան հանձնաժողովի կողմից որոշում կայացնելու և, որպես հետևանք, Խորեն Հովհաննիսյանին կարգալույծ անելու համար հիմք է ծառայել Հայ առաքելական եկեղեցու Վիրահայոց թեմի առաջնորդ Գերաշնորհ Վազգեն եպիսկոպոս Միրզախանյանի գրությունը», – Sputnik Արմենիայի թղթակցի հետ զրույցում ասաց Մայր Աթոռ Սուրբ Էջմիածնի մամուլի ծառայության ղեկավար Վահրամ Մելիքյանը։
Եկեղեցական աստիճանից զրկված վանահայրը վերադարձել է աշխարհիկ կյանք և կոչվելու է այն անունով, որը ստացել էր ծննդյան պահին` Նշան։ Հայ առաքելական եկեղեցու Վիրահայոց թեմում ևս մեկնաբանել են Հովհաննիսյանի հեռացումը։
«Մենք բավարարվում ենք Հայ առաքելական սուրբ եկեղեցու կարգապահական հանձնաժողովի որոշմամբ», – Sputnik Արմենիայի հետ զրույցում ասաց Հայ առաքելական եկեղեցու Վիրահայոց թեմի մամուլի քարտուղար Սուսաննա Խաչատրյանը։
Խորեն վարդապետ Հովհաննիսյանը (աշխարհիկ անունը` Նշան) ծնվել է 1973 թվականի հունիսի 4-ին, Արարատի մարզի Ավշար գյուղում։ 1990-1996 թվականներին ուսանել է Էջմիածնի Գևորգյան հոգևոր ճեմարանում։ 1996 թվականի մայիսի 19-ին ստացել է սարկավագի աստիճան։ 1999 թվականի նոյեմբերից Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոս անձնական քարտուղարն է եղել։
2000 թվականի հոկտեմբերին հոգևոր հովիվ է նշանակվել, պարբերաբար այցելել է Նյու Յորքի Սուրբ Խաչ եկեղեցին, իսկ 2009 թվականի ապրիլին նշանակվել է Հնդկաստանի հայերի հոգևոր հովիվ և Կալկաթայի հայկական մարդասիրական սեմինարիայի կառավարիչ։ 2015 թվականի սեպտեմբերի 1-ից զբաղեցրել է Հայ առաքելական եկեղեցու վիրահայոց թեմի Քվեմո Քարթլի շրջանի հայ համայնքի հոգևոր առաջնորդ–վերակացուի պաշտոնը։
2016 թվականի մայիսի 1-ին Խորեն վարդապետ Հովհաննիսյանը եղել է Հայ առաքելական եկեղեցու վիրահայոց թեմի առաջնորդի օգնականը` արտաքին կապերի, միջկրոնական և միջեկեղեցական հարաբերությունների, ինչպես նաև կրթական, մշակութային, երիտասարդական, տեղեկատվական, հրատարակչական, համայնքային կառույցների հետ աշխատանքի գծով։
