ԵՐԵՎԱՆ, 21 հունիսի — Sputnik. Ֆինանսների նախարար Վարդան Արամյանն այսօր լրագրողների հետ զրույցում վստահեցրեց, որ կառավարությունն ամեն ջանք գործադրելու է խոստացած 5% տնտեսական աճ ապահովելու համար: Նա շեշտեց, որ ջանքերի մասին մանրամասն գրված է կառավարության առաջարկած ծրագրում:
«5 տարվա ընթացքում մենք ուղղակի ֆիքսելու ենք 5% աճ: Մեկ տարի կարող է 4,7 լինել, մյուս տարի կձգտենք ավելի բարձր ցուցանիշի, որպեսզի միջինում ապահովենք 5 տոկոս ցուցանիշը: Մենք պետք է նաև 5 տոկոս աճի վրա մյուս տարի ևս 5 տոկոս աճ ունենանք, և այդպես շարունակ, իսկ դա արդեն լուրջ տնտեսական ցուցանիշ կլինի»,- ասաց Արամյանը:
Այդուհանդերձ, ըստ Արամյանի, կան գործոններ, որոնց դեմ կառավարությունն անզոր է:
«Մենք ապրում ենք գլոբուսի վրա, և կան անկանխատեսելի տենդենցներ, որոնք մեզ վրա էլ են ազդում: 2013 թվականին որևիցե մեկը չէր կարող կանխատեսել, որ ՌԴ-ն ԵՄ և ԱՄՆ բլոկի հետ քաղաքական հիմքով կունենա կոնֆլիկտ, որը կվերածվի տնտեսական պատերազմի: Սա որևէ մեկը չէր կարող հաշվի առնել,- ասաց նախարարը
Սակայն Արամյանը վստահեցրեց, որ կառավարության ծրագրում նույնիսկ այս անկանխատեսելի ռիսկերն են հաշվի առնվել, որոնց արդյունքում ընդունվել է միջինացված հինգ տոկոս ցուցանիշը:
