ԵՐԵՎԱՆ, 21 հունիսի — Sputnik. Կառավարության առաջիկա հինգ տարիների գործունեության ծրագիրը կազմված է առաջիկա հինգ տարիներին ՀՀԿ-ի և ՀՅԴ-ի ազատ անկախ և խելացի Հայաստանն ունենալու տեսլականի հիման վրա: Այսօր ԱԺ-ում ասաց Վարչապետ Կարեն Կարապետյանը:
«Մեր սահմանների 83%-ը փակ է, տարածաշրջանում կան բազմաթիվ ուժեղ խաղացողներ, մեր տնտեսությունը կախված է միջազգային շուկաների ցնցումներից: Կան նաև բազմաթիվ ներքին խնդիրներ: Եվ այս վիճակը դեռ երկար է շարունակվելու»,- նշեց վարչապետը։
Նա միաժամանակ հայտարարեց, որ այս իրողությունները թվարկելով կառավարությունն իր վրա դրված պատասխանատվությունից խուսափելու նպատակ չունի:
«Այլ ճանապարհ չունենք, քան պոպուլիզմից հրաժարվելը: Պետք է դադարենք քննադատել, ներդրումը մեկ օրում արդյունք չի տալիս, գյուղացին մեկ օրում արտահանող ֆերմեր չի դառնում, կառավարիչը մեկ օրում ավելի արդյունավետ չի դառնում, մեր աշխատանքի արդյունքը կախված է մեր աշխատանքի էֆեկտիվությունից ու հասարակության արձագանքից»,- ասաց Կարեն Կարապետյանը:
Կառավարությունը խոստանում է նաև առաջիկա հինգ տարում զարգացնել և ամրապնդել արդարությունը, անհանդուրժողական պայքար մղել կոռուպցիայի դեմ, շարունակել արդեն սկսված կառավարման համակարգի օպտիմալացումն ու թվայնացումը, հատկապես` տնտեսության մեջ:
Տնտեսական աճը, վարչապետի խոսքով, հիմնված կլինի «տնտեսության ներքին ռեսուրսների արդյունավետ օգտագործման և արտաքին աշխարհում մրցունակության բարձրացման վրա»:
Արտահանման աճը ՀՆԱ-ի նկատմամբ կկազմի 40-45%, աշխատավարձը կաճի 25%-ով, Կառավարությունը շարունակելու է նաև հարկային համակարգի բարեփոխումները, որի առաջին փուլից հետո միայն այս տարվա առաջին եռամսյակում բյուջետային ծախսերն ավելացվել են 57 մլրդ դրամով:
Բացի ապագայի ծրագրերը ներկայացնելուց Կարեն կարապետյանը ներկայացրեց նաև այս տարվա հունվար-մայիս ամիսների որոշ ցուցանիշներ՝ նախորդ տարվա նույն ժամանակահատվածի համեմատ:
Նրա խոսքով` տնտեսական ակտիվության ցուցանիշն այդ ընթացքում աճել է՝ 7.4, արդյունաբերական արտադրանքի ծավալն աճել է 14.4%-ով, առևտրի շրջանառության ծավալը՝ 12.8, արտահանումը՝ 21, ներմուծումը 24.4, ԱՁ-երի թիվն ավելացել է՝ 8, առևտրային կազմակերպություններինը՝ 31%-ով: Աճել է նաև օդային ուղևորափոխադրումների և բեռնափոխադրումների ծավալը՝ համապատասխանաբար` 24 և 81%-ով:
Կառավարության ղեկավարը խոստացավ նաև առաջիկա տարիներին ապահովել գյուղատնտեսության, զբոսաշրջության, դատական համակարգի բարեփոխումներ ու զարգացման տեսանելի արդյունքներ: Իսկ այս տարի, վարչապետի խոսքով, տնտեսությունը կկայունանա, որպեսզի հետագա 4 տարում սկսի զարգանալ:
«Այս ճանապարհով մենք կհասնենք մեր երազանքի Հայաստանին»,- ասաց Կարեն Կարապետյանը՝ ավարտելով ելույթը ԱԺ-ի ամբիոնից:
