ԵՐԵՎԱՆ, 21 հունիսի — Sputnik. ԱԺ «Ելք» խմբակցության անդամ Էդմոն Մարուքյանն այսօր ԱԺ-ում կառավարչության գործունեության ծրագրի ներկայացման ժամանակ հարց ուղղեց վարչապետ Կարեն Կարապետյանին՝ ո՞վ է լինելու ՀՀ վարչապետը 2018 թ-ից հետո:
«Եթե դուք եք լինելու, այս բարձր ամբիոնից հայտարարեք, թող բոլորն իմանան, եթե դուք չեք լինելու, ասեք` ով է լինելու, արդեն ժամանակ չկա»,- ասաց Մարուքյանը՝ հավելելով, որ կառավարության հնգամյա ծրագրի հաստատման համար շատ կարևոր է հատկապես այն, թե ով է շարունակելու այն իրականացնել մեկ տարի հետո և առաջիկա չորս տարիներին:
«Դուք հիմա գործ ունեք ՀՀ վարչապետի հետ, իսկ 18-ին ո՞վ է լինելու, 20-ին ո՞վ է լինելու, դա ի՞նչ կապ ունի»,- ասաց Կարապետյանը՝ այդպես էլ անպատասխան թողնելով ընդդիմադիր պատգամավորի հարցը:
