ԵՐԵՎԱՆ, 10 մայիսի – Sputnik. Էլիզա Վասը Մեդիամաքսին է տրամադրել ՀՀ կառավարության ղեկավարի հետ իր զրույցն ամբողջությամբ հրապարակելու բացառիկ իրավունքը։
«Մեր հիմնական խնդիրն է ստեղծել անվտանգ, անկախ, արդար և ինտելեկտուալ Հայաստան։ Գլխավոր շեշտը հիմա դնում ենք տնտեսության վրա և ձգտում ենք ստեղծել արդար ու հավասար պայմաններ բիզնեսի և ներդրողների համար։ Էլիզա Վասի հետ հարցազրույցում ասել է ՀՀ վարչապետ Կարեն Կարապետյանը։
Նրա խոսքով` կառավարության ծրագրերում բոլոր ներդրումային ծրագրերն ու ակնկալիքները հստակ նշված են։ Մասնավորապես, հայտարարել ենք, որ մոտակա տարիներին նախատեսում ենք 3,2 մլրդ դոլարի միջոցներ ներդնել հինգ հիմնական աղբյուրներից` մասնավոր բիզնեսի ներդրումներ, վարկեր, դոնորների ծրագրեր, պետբյուջե, համայնքային բյուջեներ։ Մենք իրատեսական ենք համարում 2017 թ. ընթացքում 830-840 մլն դոլարի նախագծերի իրականացումը»,- ասել է վարչապետը։
Ըստ նրա` հատուկ են շատ բարձր նշաձող սահմանել, որը ստիպում է թիմի բոլոր անդամներին աշխատել առավելագույն լարվածությամբ։
Վարչապետը խոսել է նաև հարևան պետությունների հետ հարաբերությունների մասին։
«Մենք խաղաղություն ենք ուզում, բայց ոչ ամեն գնով, ոչ մեր անկախության ու ազգային արժանապատվության հաշվին։ Մենք պատրաստ ենք կառուցողական բանակցությունների, սակայն եթե հակառակ կողմը նման պատրաստակամություն չի ցուցաբերում, չեմ կարծում, որ մեր տնտեսության զարգացման համար այլընտրանքներ չկան»,- ասել է նա։
Վարչապետը օրինակ է բերել Իսրայելին, որ նույնպես բավականին շատ խնդիրներ ունի` նշելով, որ պետք է զարգացնենք տնտեսությունը առկա սահմանափակումների պայմաններում։
Կարեն Կարապետյանը խոսել է նաև Եվրասիական տնտեսական միությանն անդամակցելու մասին` շեշտելով, որ դա ճիշտ որոշում էր։
«Մենք մտել ենք հինգ երկրների ակումբ, որի բնակչությունը շուրջ 180 միլիոն է կազմում։ Մեր ապրանքների վաճառքի հավանականությունը այդ շուկայում առավել բարձր է մի շարք պատճառներով։ Ակումբում կան որոշակի առավելություններ ապրանքաշրջանառության համար։ Եթե մենք հաջողության հասնենք այդ շուկայում, ինչը, ի դեպ, մեծամասամբ հենց մեզանից է կախված, կարող ենք լավ պայմաններ ստեղծել մեր տնտեսության զարգացման համար։ Մտնելով այդ ակումբ, մենք չենք մերժում մեր տնտեսության համար այլ հնարավորությունները, այդ թվում կապված Եվրոպայի հետ»,- ասել է նա։
2018 թվականին վարչապետ մնալու և հանրապետության ղեկավար դառնալու հարցին էլ Կարապետյանը լակոնիկ պատասխան է տվել` պատրաստ եմ։
Այնուհետև նա նշել է, որ այդ հարցին չափազանց իրատեսորեն է մոտենում։
«Երբեք չեմ երազել վարչապետ լինել և ոչ էլ ձգտել եմ գործադիր իշխանությանը։ Իմ այսօրվա պատրաստակամությունը ես ձևակերպում եմ ոչ թե որպես իշխանության ձգտում, այլ որպես մեր երկրում շատ բան փոխելու ցանկություն»,- ասել է նա։
Նա խոսքով` հինգ տարի հետո Հայաստանում շատ բան պետք է փոխվի` որոշումներ կայացնելու ընթացակարգը, հասարակության և էլիտայի հարաբերությունները, հասարակական կյանքում էլիտայի տեղի ընկալումը, քաղաքացիների կրթության մակարդակը, բիզնեսի վարման պայմանները։
