ԵՐԵՎԱՆ, 9 հունիսի – Sputnik. ԽՍՀՄ ժողովրդական արտիստ, ԽՍՀՄ պետական մրցանակի դափնեկիր, մանկավարժ Գիա Կանչելին վերջին անգամ յոթ տարի առաջ է եղել Երևանում։ Այն ժամանակ հույս էլ չուներ, որ կկարողանա ևս մեկ անգամ այցելել Հայաստան, որտեղ նա բազմաթիվ ընկերներ ունի։
«Երջանիկ եմ, որ ողջ եմ ու այս քաղաք գալու հնարավորություն ունեցա։ Այստեղ ես շատ անգամ եմ եղել և բազմաթիվ ընկերներ ունեմ։ Անկեղծ ասած, կարծում եմ` սա կլինի իմ վերջին այցելությունը, քանի որ առողջական խնդիրներ ունեմ, բայց Աստված տա, եթե կրկին կարողանամ գալ, միայն երջանիկ կլինեմ», – Sputnik Արմենիա մամուլի կենտրոնում կայացած ասուլիսի ժամանակ ասաց Գիա Կանչելին։
Վրացի երգահանը ընկերություն է արել հայ երգահանների աստղաբույլի հետ` Ավետ Տերտերյան, Էդուարդ Միրզոյան, Ալեքսանդր Հարությունյան, Ղազարոս (Լազար) Սարյան և Առնո Բաբաջանյան։ Իսկ հայտնի վեց սիմֆոնիաները մաեստրոն գրել է Դիլիջանի ստեղծագործական տանը, որտեղ հաճախ են հավաքվել երգահան ընկերները։ Ի դեպ, Կանչելին «Միմինո» ֆիլմի Դիլիջանի մասին լեգենդար արտահայտության հեղինակն է։ Նա է համոզել ռեժիսոր Դանիելյանին, որ Ֆրունզիկը ոչ թե «Լենինական» ասի, այլ «Դիլիջան», քանի որ Կանչելին տարիներ շարունակ հենց այնտեղ է ապրել։
Մի անգամ Կանչելիին է դիմել Միխայիլ Կալազոտովը` համր ֆիլմի (հիմա արդեն խորհրդային կինոյի դասական դարձած «Աղ Սվանեթին») համար երաժշտություն գրելու խնդրանքով։
«Այդ դրվագում ես մի վառ հատված եմ օգտագործել Ավետ Տերտերյանի երրորդ սիմֆոնիայից», – խոստովանեց Կանչելին։
Երաժշտության հանդեպ սերը մաեստրոյի հոգում ծնվել է ջազի հետ ծանոթությունից հետո, հատկապես այն ժամանակ, երբ լսել է Գլեն Միլլերի, Էլլա Ֆիցջերալդի ստեղծագործությունները։ Կանչելին մինչ օրս էլ անտարբեր չէ այդ ժանրի նկատմամբ և ուշադիր հետևում է ջազի աշխարհի նորություններին։
Կանչելիի համար այսօր ամենակարևորը ներքին ցենզուրան է, ազնվությունը, մարդկանց հետ հարաբերությունները։
«Ես մաքսիմալիստ եմ, աշխատում եմ չփոխել վերաբերմունքս շուրջս տեղի ունեցող երևույթների նկատմամբ, հնարավոր է` բնավորությանս այդ գիծն ինձ հաճախ խանգարել է», – ասում է Կանչելին։
Նա ակտիվորեն հետևում է համաշխարհային նորություններին, և նրան հուզում է աշխարհում տեղի ունեցող ամեն բան։ Երգահանն իրեն լավ է զգում այնտեղ, որտեղ նրան սիրում են ու գնահատում։
«Յուրաքանչյուր ստեղծագործություն սպառում է մարդուն, և միայն քունն է օգնում վերականգնվել»,– ասաց Կանչելին Sputnik Արմենիայի թղթակցի հետ զրույցում։
Հունիսի 18–ից 20–ը Հայաստանում Կանչելիին նվիրված փառատոն է անցկացվում։ Փառատոնի շրջանակում Երևանում երկու սիմֆոնիկ համերգ և մեկ կամերային երեկո է կայանալու,որոնց ընթացքում կներկայացվեն Գիա Կանչելիի ստեղծագործությունները։
