ԵՐԵՎԱՆ, 19 հունիսի — Sputnik. ՀՀ արտգործնախարար Էդվարդ Նալբանդյանը հունիսի 19-ին կմեկնի Լյուքսեմբուրգ։ Այս մասին հայտնում է ՀՀ ԱԳՆ մամուլի ծառայությունը։
Էդվարդ Նալբանդյանը Լյուքսեմբուրգում կմասնակցի Եվրոպական միության և Արևելյան գործընկերության երկրների արտաքին գործերի նախարարների հանդիպմանը։
Հայաստանի համագործակցությունը Եվրոպական Միության հետ ՀՀ արտաքին քաղաքականության կարևոր ուղղություններից է:
ՀՀ անկախությունից ի վեր ԵՄ հետ համագործակցությունը մեծապես նպաստել է Հայաստանում տնտեսության, արդարադատության, պետական կառավարման ոլորտներում բարեփոխումների իրականացմանը, ժողովրդավարական հասարակության կայացմանը, մարդու իրավունքների և հիմնարար ազատությունների պաշտպանությամբ զբաղվող ինստիտուտների ամրապնդմանը:
Արևելյան գործընկերությունը մեկնարկել է 2009թ. մայիսի 7-ին Պրահայում կայացած ԵՄ և Արևելյան գործընկեր պետությունների ղեկավարների գագաթնաժողովով, որի ընթացքում ընդունվել է համատեղ հռչակագիր:
«Արևելյան գործընկերության» շրջանակում բազմակողմ համագործակցությունն իրականացվում է չորս տարբեր թեմատիկ պլատֆորմների միջոցով`ժողովրդավարություն, արդյունավետ կառավարում և կայունություն, տնտեսական ինտեգրում և համապատասխանեցում ԵՄ քաղաքականության հետ, էներգետիկ անվտանգություն, մարդկանց միջև շփումներ:
