ԵՐԵՎԱՆ 18 հունիսի —Sputnik, Արմենուհի Մխոյան. Ազգո տատը ողջ կյանքի ընթացքում եղել է սիրված ու հարգված. երկար տարիներ նախ մանկապարտեզում է աշխատել, ապա ղեկավարել է նույն մանկապարտեզը, իսկ մինչ Երազգավորս տեղափոխվելը Ազգանուշ Ալեքսանյանն ապրել ու սովորել է Լենինականում, մինչև ամուսնուն՝ Բեյբութին տեսնելն ու սիրահարվելը:
Սիրահարվել, 16 տարեկանում ամուսնացել ու տեղափոխվել է Երազգավորս: Հիմա էլ, երբ հարցնում ենք ամուսնու մասին, կինը ժպտալով ասում է՝ սիրել է ու սիրված եղել՝ ծոնթացել է ամուսնու հետ ուժեղ անձրևի ժամանակ, երբ անձրևից պաշտպանվելու համար Բեյբութը աղջկան առաջարկել է թաքնվել իր շինելի տակ:
Ազգո տատի հարազատները Ախուրյան գետից այս կողմ,՝ ինչպես ինքն է ասում, փախե-փախի ժամանակ տեղափոխվել են Բաշիրակից: Ազգո տատի երեխաները իրար հերթ չտալով պատմում են. «Ինքը փոքր է եղել 1 տարեկան, երբ հարազատները տեղափոխվել են: Տատի մայրը, երբ կանգնել է Երազգավորսի ամենաբարձր բլրի վրա ու նայել սահմանից այն կողմ, ասել է՝ էստեղից Բաշիրակը երևում է: Ասել ու կարոտն է առել»:
Տատից փորձեցի իմանալ իր երկարակեցության գաղտնիքը: Մինչ տատը դժվարությամբ կպատասխաներ, երեխաները շտապելով ասում են՝ ամուսնու սերն է գաղտնիքը: «Մեր հայրը շատ է սիրել մեր մորը: Մայրս երջանիկ կին է եղել՝ սիրահարված ու սիրված: Ուր ասես հայրս նրան չի տարել՝ հանգստյան տներ, առողջարաններ՝ դա է երկարակեցության գաղտնիք»,-նշեցին աղջիկները, իսկ փեսաներն ու հարսները շտապեցին բացահայտել իրենց զոքանչի ու սկեսրոջ թուլությունը. «Պապը խմել չի սիրել, իսկ տատն ամեն օր՝ մինչ հիմա, օղի է խմում»,-անկեղծանում են նրանք:
Բեյբութն այնքան է կնոջը սիրել, որ նրա փոխարեն 8 ամիս կալանավորված է եղել: Ազգանուշի տետրի վրա 1937 թվականին տեսել են Խանջյանի նկարը ու կալանավորել ամուսնուն, բայց 8 ամիս հետո ազատ են արձակել:
Տատը մինչև վերջերս իրեն շատ առողջ է զգացել, 2 ամիս առաջ կոտրել է ոտքն ու հիմա մի փոքր խեղճացել է, բայց մինչև օրս էլ կարդում է: Կարդալ՝ հատկապես, ռուսերեն գրքեր՝ շատ է սիրում:
Ազգո տատը, մինչ ազգի ամենափոքր թոռների հետ ծննդյան տորթի մոմերի փչելը, բոլորին առողջություն մաղթեց: «Բոլորիդ կրկնակի առողջություն ու երջանկություն եմ մաղթում, աշխարհին էլ՝ խաղաղություն»,-նշեց տատն ու խմեց շամպայնը:
