ԵՐԵՎԱՆ, 16 հունիսի — Sputnik. Կիևի «Սոֆիա Կիևսկայա» ազգային արգելոցում կայացել է «Հայկական խաչքարեր» ցուցահանդեսի բացման հանդիսավոր արարողությունը։ Այս մասին հայտնում է Analitikaua.net–ը` հղում անելով Ուկրաինայի հայերի միության մամուլի ծառայությանը։
Ցուցահանդեսի կազմակերպիչը «Ուկրաինայի հայերի միություն» հասարակական կազմակերպությունն է, ինչպես նաև «Սոֆիա Կիևսկայա» ազգային արգելոցը, Ուկրաինայում ՀՀ դեսպանատունն ու Հայ առաքելական եկեղեցու ուկրաինական թեմը։
Ուկրաինայի հայերի միության ղեկավար Վիլեն Շատվորյանը ողջույնի խոսքում նշել է, որ հայերն ու ուկրաինացիներն առանձնահատուկ վերաբերմունք ունեն իրենց պատմության և մշակույթի նկատմամբ։
Միջոցառումը մեկնարկել է աղոթքով, որը հնչեցրել է Հայ առաքելական եկեղեցու ուկրաինական թեմի առաջնորդ Տեր Մարկոս եպիսկոպոս Հովհաննիսյանը։ Հավաքվածներին է դիմել Ուկրաինայի ՀՀ արտակարգ և լիազոր դեսպան Անդրանիկ Մանուկյանը։ Հյուրերի առաջ ելույթ են ունեցել հայտնի դուդուկահար Արմեն Կոստանդյանը և Կիևի Սուրբ Նահատակաց Հայկական մատուռի ծխական երգչախումբը։
Ուկրաինայի հայերի միության նախագահ Վիլեն Շատվորյանը հայկական մշակույթի հանրահռչակման գործում ունեցած ներդրման համար շնորհակալություն է հայտնել խաչքարերի վարպետ Արտակ Համբարձումյանին, «Սոֆիա Կիևսկայա» ազգային արգելոցի տնօրեն Նելյա Կուկովալսկայային և երաժիշտ Արմեն Կոստանդյանին։ Ցուցահանդեսը կտևի մինչ հուլիսի 2-ը, այնուհետև խաչքարերը կտեղադրվեն Ուկրաինայի տարբեր մարզերում։ Ցուցահանդեսին ավելի քան տասնյակ խաչքար է ներկայացվել։
