Ռուբեն Բաբայանը Sputnik Արմենիայի հետ զրույցում նշեց, որ ՀՀ օրհներգի փոփոխության անհրաժեշտություն չկա, որովհետև դա Հայաստանի առջև ծառացած առաջնահերթ խնդիրը չէ։
«Մենք ավելի շատ կյանքի փոփոխության կարիք ունենք, քան օրհներգի»,- ասաց նա։
Բաբայանը չհերքեց, որ կան շատ ավելի լավ մեղեդիներ ու բանաստեղծություններ, որոնք կարող են օրհներգ դառնալ, սակայն այսօրվա օրհներգը փոփոխման կարիք չունի, որովհետև այն, անկախ թերություններից, կապված է Հայաստանի անկախության հետ։
«Այն ավելի շատ խորհրդանիշ է, քան երաժշտություն ու լիրիկա»,- ասաց Բաբայանը` շեշտելով` պարտադիր չէ, որ օրհներգն ամենալավ երգը լինի։
Նա նշեց ԱՄՆ-ի, Ֆրանսիայի, Ռուսաստանի օրինակները։
«Չեմ կարծում, որ ԱՄՆ-ի, Ֆրանսիայի կամ Ռուսաստանի օրհներգերը նրանց լավագույն ստեղծագործություններն են»,- ասաց Բաբայանը։
ՀԻշեցնենք, որ մի քանի օր առաջ աշխարհահռչակ երգիչ Շառլ Ազնավուրն ասել էր` Հայաստանի այժմյան օրհներգն առանձնապես ոչինչ չի ասում, և հնարավոր է` «Քեզ համար, Հայաստան» երգը նոր օրհներգը դառնա:
