ԵՐԵՎԱՆ, 15 հունիսի — Sputnik. Ներդրումների հարցը ամենակարևորն է Հայաստանի համար եվրասիական ինտեգրման գործընթացում, «Ապրանքի իրացման լավագույն ուղիները ԵԱՏՄ շուկայի մասնակիցների միջև» խորագրով Բիշքեկ – Երևան – Սարատով – Մոսկվա – Աստանա – Մինսկ տեսակամրջի ընթացքում հայտնել է լրագրող, քաղաքական վերլուծաբան Հայկ Խալաթյանը։
«Հայաստանի տնտեսությունն անցած տարի սկսել է դրական շարժ գրանցել. կտրուկ, գրեթե 50%–ով աճել է հայկական ապրանքների արտահանումը։ Սակայն այդ տեմպերը պահպանելու համար անհրաժեշտ է լուծել ներդրումների հարցը, որը հայկական տնտեսության համար ամենացավոտ հարցերից է», – ասաց Խալաթյանը։
Նա նշեց, որ եվրասիական ինտեգրման գործընթացում Հայաստանի մասնակցությունը ոչ միայն տնտեսական, այլև քաղաքական բնույթ է կրում։
«Այստեղ կառանձնացնեի ներքաղաքական գործոնը, երբ հենց հայկական հասարակության մեջ վեճեր կան այն մասին, թե ձեռնտու էր արդյոք միանալ Եվրասիական տնտեսական միությանը ԵՄ ասոցացման համաձայնագիրը ստորագրելու փոխարեն։ Բացի այդ, պետք է հաշվի առնել Հարավային Կովկասի առանձնահատկությունը, որտեղ հանրապետություններից մեկը` Հայաստանը, եվրասիական ինտեգրման ուղղությունն է բռնել, Վրաստանը` եվրոպական, իսկ Ադրբեջանը դեռ տատանվում է այդ երկու ուղղությունների միջև», – հավելեց լրագրողը։
Նրա խոսքով` Հայաստանի և Վրաստանի հաջողությունը կօգնի Ադրբեջանին կողմնորոշվել այդ հարցում։
«Արտաքուստ առայժմ Վրաստանն ավելի հուսադրող պատկեր է ցույց տալիս։ Կարծում եմ, պետք է հայկական տնտեսության մեջ ներդրումների հարցը լուծել, ինչը կհանգեցնի ապրանքաշրջանառության ավելի մեծ աճի և երկրի հասարակատնտեսական իրավիճակի բարելավմանը։ Այս ամենը դրական ազդեցություն կունենա եվրասիական ինտեգրման գործընթացի վրա», – ընդգծեց Խալաթյանը։
Նա կարծում է, որ պետք է Հայաստանում ավելի շատ ներդրումներ անել և օգտագործել երկրի առավելությունները։
«Օրինակ, մենք մեծ մարդկային ներուժ ունենք, ինչի մասին վկայում է ՏՏ ոլորտի մեծ աճը։ Մենք ճկուն արտաքին քաղաքականություն ենք վարում», – ասաց լրագրողը, ընդգծելով, որ Հայաստանը Իրանի հետ սահմանին ազատ առևտրային գոտի է ստեղծում, ինչը հնարավորություն կտա դուրս գալ ոչ միայն եվրասիական և եվրոպական, այլև իրանական շուկա։
Հայաստանը նաև բանակցություններ է սկսել Չինաստանի հետ` առևտրի արտոնյալ ռեժիմի ստեղծման վերաբերյալ։
