ԵՐԵՎԱՆ, 14 հունիսի — Sputnik. Տաջիկստանի Հանրապետության նախագահ Էմոմալի Ռահմոնը Երևանում հայ գործընկերոջ` Սերժ Սարգսյանի հետ համատեղ ասուլիսի ընթացքում կոչ է արել տեղական ընկերություններին մասնակցել տաջիկական նախագծերին։
«Հայաստանի և Տաջիկստանի միջև համագործակցությունը առևտրատնտեսական, մշակութային-մարդասիրական և այլ բնագավառներում դեռևս չի համապատասխանում ունեցած պոտենցիալին»,- ասաց Ռահմոնը։
Նրա խոսքով` կողմերը շահագրգռված են, որ տնտեսության իրական սեկտորներում համագործակցության ամրապնդման գործնական քայլեր արվեն։
«Մենք կոչ ենք արել հայկական ընկերություններին օգտագործել իրենց ներդրումային հնարավորությունները և նոր տեխնոլոգիաները, մասնակցել մեր նախագծերին, որոնք գրավիչ են տնտեսական եկամուտի տեսակետից», — ասաց Ռահմոնը։
Նրա խոսքով` նման ծրագրեր կան առևտրի, գյուղատնտեսական ապրանքների արտադրության և վերամշակման, սննդարդյունաբերության, թեթև արդյունաբերության, հանքարդյունաբերության, էներգետիկայի, հեռահաղորդակցության, գիտության և կրթության, առողջապահության ոլորտներում։
Ռահմոնը նշեց, որ Տաջիկստանը պատրաստ է դրա համար բարենպաստ պայմաններ ստեղծել։
Ինչ վերաբերում է Ղարաբաղյան հակամարտությանը, ապա Ռահմոնի խոսքով` ելնելով իր խաղաղապահական փորձից, Տաջիկստանը կողմ է առկա հակասությունների և հակամարտությունների խաղաղ կարգավորմանը միջազգային սկզբունքների և նորմերի շրջանակում։
«Մեր կարծիքով` Լեռնային Ղարաբաղի խնդրի լուծման ամենակառուցողական ուղին բանակցությունն է», — նշեց Ռահմոնը։
Տաջիկստանի նախագահի Հայաստան պաշտոնական այցի արդյունքում մի շարք փաստաթղթեր են ստորագրվել, որոնք ուղղված են երկկողմանի համագործակցության ամրապնդմանը Հայաստանի Հանրապետության և Տաջիկստանի Հանրապետության մի շարք ոլորտներում։
Մասնավորապես, ստորագրվել են՝ «Հայաստանի Հանրապետության կառավարության և Տաջիկստանի Հանրապետության կառավարության միջև քաղաքացիների փոխադարձ այցելությունների մասին», «Հայաստանի Հանրապետության կառավարության և Տաջիկստանի Հանրապետության կառավարության միջև օդային հաղորդակցության մասին», «Հայաստանի Հանրապետության կառավարության և Տաջիկստանի Հանրապետության կառավարության միջև հեռահաղորդակցության և փոստային կապի բնագավառում համագործակցության մասին», «Հայաստանի Հանրապետության կառավարության և Տաջիկստանի Հանրապետության կառավարության միջև կրթության որակավորումների, գիտական աստիճանների ու գիտական կոչումների փոխճանաչման և համադրելիության մասին», «Հայաստանի Հանրապետության կառավարության և Տաջիկստանի Հանրապետության կառավարության միջև երիտասարդության հետ աշխատանքի և սպորտի բնագավառում համագործակցության մասին», «Հայաստանի Հանրապետության կառավարության և Տաջիկստանի Հանրապետության կառավարության միջև առողջապահության բնագավառում համագործակցության մասին», «Հայաստանի Հանրապետության գլխավոր դատախազության և Տաջիկստանի Հանրապետության գլխավոր դատախազության միջև համագործակցության մասին», «Հայաստանի Հանրապետության գիտությունների ազգային ակադեմիայի և Տաջիկստանի Հանրապետության գիտությունների ակադեմիայի միջև գիտական համագործակցության մասին» համաձայնագրերը և «Հայաստանի արտաքին գործերի նախարարության և Տաջիկստանի արտաքին գործերի նախարարության միջև 2018-2019թթ. համար համագործակցության ծրագիրը»:
