ԵՐԵՎԱՆ, 14 հունիսի — Sputnik, Խաչիկ Չախոյան. Առաջին անգամը, չէ, որ հայտնի ֆուտբոլիստը հայտնվում է բոլորի ուշադրության կենտրոնում, սակայն այս անգամ Մխիթարյանը հայտնել է իր կարծիքը ոչ թե ներկայի, այլ ապագայի վերաբերյալ: Պատասխանելով երեխաների հարցերին՝ հայ ֆուտբոլիստը խոսել է հայերի սերունդների մասին ու ընդգծել, որ առօրյա կյանքում էլ համարյա ամեն օր շփվում է մանուկների հետ ու համոզված է, որ Հայաստանը տաղանդների երկիր է:
Անվանի ֆուտբոլիստը, շնորհակալություն հայտնելով ասուլիսի կազմակերպիչներին, ասել է, որ չնայած իր մանկությունն անցել է Ֆրանսիայում, Հայաստանում երեխաների մանկությունը ավելի լավ է անցնում: Մխիթարյանը տարբերություն է գտել Եվրոպայում ու Հայաստանում ապրող մանուկների միջև, ընդգծելով, որ Հայաստանում երեխաները անհամեմատ ընկերասեր են, իրար հետ կապված:
Անդրադառնալով արդեն ավարտված մրցաշրջանին, Հենրիխն իր խփած գնդակներից ամենագեղեցիկը համարել է «Սանդեռլենդի» դարպասը «կարիճ» հարվածով խփած գնդակը, իսկ ամենակարևորը՝ Եվրոպայի լիգայի եզրափակչում «Այաքսի» դարպասը խփած հաղթական գնդակը: Միևնույն ժամանակ, հայ ֆուտբոլիստն իր համար դեռ չի առանձնացրել կարիերայի լավագույն պահը, նշելով, որ լավ պահեր դեռ լինելու են։
