ԵՐԵՎԱՆ, 8 հունիսի — Sputnik, Լաուրա Սարգսյան. Վերջին ժամանակաշրջանում Հայաստանում ավելացել է վերին շնչուղիների սուր շնչառական հիվանդություններով տառապող հիվանդների թիվը։ Միայն բրոնխիալ ասթմայով տառապում է երեխաների 12,6%-ը, մեծահասակների 7%-ը։
«Հիվանդների վիճակը թեթևացնելու և առողջ մարդկանց մոտ հիվանդության զարգացումը կանխելու համար պետք է մի շարք միջոցներ ձեռնարկել, որոնց թվում են նաև հանգիստն ու ճիշտ սնունդը», — Sputnik Արմենիայի թղթակցի հետ զրույցում ասաց Հայաստանի գլխավոր թոքաբան Անդրանիկ Ոսկանյանը։
Նրա խոսքով` օրգանիզմը պետք է վերականգնվելու հնարավորություն ունենա, ինչը շատ դժվար է անել կյանքի այսօրվա ռիթմի ու քաղաքի պայմաններում։ Իմունային համակարգը չի հասցնում ադապտացվել։ Թոքաբանը խորհուրդ է տալիս լեռնային առողջարաններ հաճախել և հատուկ թերապիայի կուրսեր անցնել։
«Ծովային հանգիստը նույնպես օգտակար է, սակայն չափից շատ խոնավությունն ու օդի բարձր ջերմաստիճանը բարենպաստ միջավայր են ստեղծում բազմաթիվ մանրէների բազմացման համար», — ասաց Ոսկանյանը։
Վերոհիշյալ հիվանդությունների հարուցիչներից են ծխախոտի ծուխը, բրդյա իրերի չարաշահումը և մի շարք այլ գործոններ։ Ոսկանյանը համարում է, որ Երևանը և հատկապես քաղաքի կենտրոնը չափազանց աղտոտված է։
«Այսօր մեր քաղաքն «օղաբլիթի» համախտանիշ ունի։ Այս ճանապարհն անցնում են աշխարհի բոլոր զարգացող քաղաքները, իսկ խնդիրն առաջին անգամ բարձրաձայնել են ամերիկացիները», — ասաց Ոսկանյանը։
Նրա խոսքով` մարդիկ հասկանում են, որ քաղաքի կենտրոնն աղտոտված է և ծայրամասեր են տեղափոխվում։ Ստացվում է, որ կենտրոնը` օղաբլիթի խոռոչն է, իսկ ծայրամասերը` հենց օղաբլիթը։
Թոքաբանը կարծում է, որ քաղաքի օդի մաքրման հարցում մեծ նշանակություն ունի կեղտաջրերի համակարգի կարգավորումը, քանի որ երբ այդ համակարգը խախտվում է, օդի բնական մաքրիչները` ձյունը և անձրևը, չեն կարողանում իրենց դերը կատարել։
