ԵՐԵՎԱՆ, 8 հունիսի — Sputnik. «Արտ–ֆեստ» միջազգային երիտասարդական V փառատոնի կազմակերպիչները միջոցառումը դիմավորել են ժպիտով և նույն տրամադրությամբ էլ պատրաստվում են ավարտել այն։ Լրագրողների հետ հանդիպման ժամանակ այդ մասին ասաց փառատոնի գեղարվեստական ղեկավար Դավիթ Հակոբյանը։
«Փառատոնը մենք սկսում ենք ժպիտով, այդպես էլ կավարտենք այն։ Այս փառատոնը կարևոր է մեր երիտասարդության զարգացման համար», – ասաց Հակոբյանը։
«Արտ Ֆեստ 2017» միջազգային երիտասարդական փառատոնը, որն այս տարի կազմակերպվում է 5-րդ անգամ, կանցկացվի հունիսի 8-19-ը Երևանում։
Այս տարի փառատոնին մասնակցելու 500 հայտից ընտրվել է 400–ը։ Աշխատանքներ են ներկայացրել Ուկրաինայի, Վրաստանի, Ղազախստանի և Հայաստանի արվեստագետները։ Ի տարբերության անցյալ տարիների, այս տարի բոլոր աշխատանքները ստիպված են եղել հաղթահարել նախընտրական փուլը։ Մեկ այլ նորամուծություն էլ կա. ավելացել են «Լավագույն սցենար» և «Լավագույն դրամա» անվանակարգերը, որոնք նվիրված են հայ գրող և հրապարակախոս Ռուբեն Հովսեփյանին։
««Լավագույն սցենար», «Լավագույն դրամա» անվանակարգերի հաղթողները 100 000 դրամ կստանան Ռուբեն Հովսեփյանի ընտանիքից», – ասաց փառատոնի նախագահ Էրիկ Բարսեղյանը։
«Լավագույն պիես» անվանակարգում հաղթող մասնակցի աշխատանքը կթարգմանվի տարբեր լեզուներով։
Երևանի թատրոնի և կինոյի պետական ինստիտուտը, Երիտասարդ ստեղծագործողների միությունը և ԵԹԿՊԻ Ուսանողական թատրոնը՝ աջակցությամբ ՀՀ մշակույթի նախարարության և Երևանի քաղաքապետարանի, 2013թ.-ից ի վեր կազմակերպում են ամենամյա «Արտ ֆեստ» երիտասարդական բաց փառատոնը` մեկ տանիքի ներքո խորագրով: Կարևորելով երիտասարդ արվեստագետների ներուժը և ինքնադրսևորվելու անհրաժեշտությունը, «Արտ ֆեստ» փառատոնը համախմբում է ստեղծագործող երիտասարդներին արվեստի հետևյալ տեսակներում՝ թատերական արվեստ, կինոարվեստ, երգարվեստ, կերպարվեստ (գեղանկարչություն, քանդակագործություն, գրաֆիկա, լուսանկարչություն), դիզայն և դեկորատիվ-կիրառական արվեստ, հագուստի մոդելավորում:
Փառատոնը մրցութային բնույթի է, որին մասնակցում են 16-30 տարիքային սահմանում գտնվող անհատներն ու ստեղծագործական խմբերը: Մասնագիտական հանձնախումբը դիտում է ցուցադրություններն, ընտրում լավագույն աշխատանքները և մրցանակաբաշխության օրը հանդիսավորությամբ հանձնում պատվավոր մրցանակները։
