ԵՐԵՎԱՆ, 8 հունիսի — Sputnik. ՏՏ ընկերությունների և ՀՀ պաշտպանության նախարարության համագործակցության հարցը «ԴիջիԹեք» համաժողովի հիմնական թեմաներից մեկը կլինի։ Այս մասին լրագրողների հետ հանդիպման ժամանակ ասաց Ինֆորմացիոն տեխնոլոգիաների ձեռնարկությունների միության (ԻՏՁՄ) նախագահ Ալեքսանդր Եսայանը։
Ըստ նրա` համաժողովի ընթացքում ռազմարդյունաբերությանն ուղղված քննարկումներ կլինեն։
«Համաժողովում ներկայացված կլինեն տարբեր կազմակերպություններ, որոնք մասնագիտացված են այս ոլորտում, կլինեն նաև ՀՀ ՊՆ ներկայացուցիչները։ Կամփոփենք անցած տարվա ձեռքբերումներն ու կքննարկենք հետագա քայլերը»,- ասաց Եսայանը։
ԻՏՁՄ գործադիր տնօրեն Կարեն Վարդանյանն իր հերթին նշեց, որ այս տարի կքննարկվի ոլորտի համագործակցության երկրորդ փուլը։
«Այս տարի կքննարկվի, թե ինչն է խանգարում, որ ՏՏ ոլորտն ավելի ակտիվ մասնակցի մեր երկրի պաշտպանունակությանն առնչվող գործընթացներին։ Խոսքը լաբորատորիաների, տեխնոլոգիական կենտրոնների մասին է»,- ասաց Վարդանյանը։
«ԴիջիԹեք» համաժողովում թեմատիկ մի շարք քննարկումներից բացի կանցկացվեն քննարկումներ 2019 թվականին Երևանում WITSA-ի կողմից կազմակերպվող ՏՏ համաշխարհային համաժողովի (World Information Technology and Services Alliance) նախապատրաստական աշխատանքների վերաբերյալ։
«Վարչապետն ասել է, որ կառավարությունը բոլոր ջանքերը կդնի, որ 2019թ. Հայաստանում կայանալիք համաժողովն ամենաբարձր մակարդակով լինի»,- նշեց Վարդանյանը:
WITSA նախագահ Իվոն Չիուն էլ ընդգծեց, որ իր առաքելությունն է համարում ՀՀ կառավարության հետ խոսելը, քննարկելը ու լավ ու համագործակցություն ստանալը:
Կազմակերպիչների խոսքով` համաժողովը 9 տարվա ընթացքում արդյունավետ հարթակ է դարձել ՏՏ ոլորտի, բիզնես ճյուղերի և կառավարության միջև երկխոսություն սկսելու համար։
10-րդ «ԴիջիԹեքի» օրակարգային թեմաներն են Երևանում 2019 թվականին ՏՏ համաշխարհային հանձնաժողովի կազմակերպչական աշխատանքների մեկնարկը, ՏՏ լուծումները՝ ՀՀ տուրիզմին խթանելու նպատակով, ՓՄՁ-ների գործունեության արդյունավետության բարձրացումը՝ ՏՏ լուծումների միջոցով, տեխնոլոգիաների ոլորտի և ՀՀ ԶՈւ համագործակցության խնդիրները և այլն։
2019 թվականին համաժողովին մասնակցելու համար Հայաստան կժամանի ՏՏ ոլորտի միջազգային առաջատար ընկերությունների ավելի քան 2000 ներկայացուցիչ:
ԻՏՁՄ-ն հիմնադրվել է 2000 թվականին որպես Հայաստանում գործող տեղեկատվական և հեռահաղորդակցական տեխնոլոգիաների (ՏՀՏ) ոլորտի ձեռնարկությունների բիզնես ասոցիացիա: Այն ստեղծվել է տեղեկատվական տեխնոլոգիաների (ՏՏ) և տեղեկատվական և հեռահաղորդակցական տեխնոլոգիաների (ՏՀՏ) ոլորտների ձեռնարկությունների, ընկերությունների կողմից՝ տնտեսական շահերի պաշտպանության, բիզնեսի խթանման և ՏՀՏ ոլորտում հետազոտությունների առաջընթացի խրախուսման նպատակով:
