ԵՐԵՎԱՆ, 7 հունիսի – Sputnik. «Ինտեգրման երկխոսություն» երկրորդ Եվրասիական քաղաքացիական համաժողովը կանցկացվի այսօր Սևաստոպոլում։
«Զարգացում» հասարակական շարժման և Երիտասարդների եվրասիական քաղաքացիական խորհրդի ղեկավար (ԵԵՔԽ) Վահան Եղիազարյանը Sputnik Արմենիային հայտնեց, որ համաժողովի անցկացման վայրը պատահական չի ընտրվել։
«Պատվիրակները, հասարակական կազմակերպությունների առաջնորդները և ակտիվ երիտասարդները (17 երկրի ներկայացուցիչ, ընդհանուր առմամբ ավելի քան 40 մարդ) անձամբ կծանոթանան Ղրիմի պատմությանն ու բազմազգ մշակույթին։ Բացի այդ, համաժողովի մասնակիցները կկարողանան Եվրասիական տնտեսական միության և Ռուսաստան–ԵՄ հարաբերությունների զարգացման շուրջ հարցեր քննարկել»,– ասաց Եղիազարյանը։
Նա նշեց, որ ԵԱՏՄ երկրների քաղաքացիական հասարակությունների ներկայացուցիչների միջև թույլ կապերը խոչընդոտում են ինտեգրման զարգացումը, համախմբումն ու բուն միության ուժեղացումը։
ԵԵՔԽ կենտրոնական միջոցառումն ամենամյա Եվրասիական քաղաքացիական համաժողովն է։
«Այս տարի մենք պատրաստվում ենք նոր կամուրջներ կառուցել ԵՄ և ԵԱՏՄ մարդասիրական համագործակցության համար։ Ցավոք, քաղաքական հարցերի սպեկտորը խեղդում է քաղաքացիական համագործակցությունը, ինչն իր հերթին թուլացնում է փոխըմբռնումը և վատացնում է Եվրասիական մայրցամաքի երկու առանցքային միավորումների զարգացման հեռանկարները։ ԵԵՔԽ–ն եվրոպական գործընկերների հետ համագործակցման ակտիվացման նախաձեռնողը կլինի», – ընդգծեց Եղիազարյանը։
«Երիտասարդները հանուն ընդհանուր ապագայի» Եվրասիական քաղաքացիական առաջին համաժողովը անցկացվել է Երևանում 2016 թվականի սեպտեմբերի 23–ից 26–ը։
