ԵՐԵՎԱՆ, 7 հունիսի — Sputnik. ՀՀ ԱԺ քննարկում է Հայաստանի մի շարք խոշոր ձեռնարկությունների պետական բաժնետոմսերի փաթեթների վաճառքի հարցը։
Ինչպես նշեց հիմնական զեկուցող Հայաստանի կառավարությանն առընթեր պետական գույքի կառավարման վարչության պետ Արման Սահակյանը, ծրագիրն ուղղված է սոցիալ–տնտեսական զարգացման և հարկաբյուջետային քաղաքականության հարցերի լուծմանը։ «Ծրագրի հիմնական նպատակներն են երկրի տնտեսության մեջ մրցակցության խթանումը, բաժնետոմսերի պետական փաթեթների վաճառքի ճանապարհով ընկերության գործունեության արդյունավետության բարձրացումը», – ասաց Սահակյանը։
Ընդդիմադիր պատգամավորներն իրենց հերթին տարակուսանք հայտնեցին ընկերությունների ընտրության սկզբունքի վերաբերյալ, ինչպես նաև ցուցակում ռազմավարական նշանակության ձեռնարկությունների առկայության մասին։
Հայաստանի կառավարությունն ավելի վաղ հաստատել է 2017-2020 թվականների սեփականաշնորհման ծրագիրը, որի համաձայն նախատեսվում է սեփականաշնորհել 47 պետական կազմակերպություն։
Ցուցակի համաձայն` սեփականաշնորհումը վերաբերվելու է մի քանի խոշոր ընկերությունների, այդ թվում` «Հայփոստ» փոստային կապի ազգային օպերատորին, «Հայֆիլմ» կինոստուդիային, Հայաստանի կառավարության ընդունելությունների տանը, «Հրազդան մարզադաշտ» ՓԲԸ–ին, «Հայավտոկայան» ՓԲԸ–ին, Երևանի ոսկերչական գործարանի պետական բաժնետոմսերի փաթեթին, Կուրորտաբանության և ֆիզիոթերապիայի գիտահետազոտական ինստիտուտին, Ֆանարջյանի անվան ուռուցքաբանության ազգային կենտրոնին, Ռադիոիզոտոպների արտադրության կենտրոնին և այլն։ Այս ընկերությունների վաճառքից պետությունը մտադիր է ստանալ 35-36 մլրդ դրամ։
