ԵՐԵՎԱՆ, 7 հունիսի – Sputnik. Հայաստանի Ազգային ժողովը քննարկել է «Կոռուպցիայի կանխարգելման հանձնաժողովի մասին» նոր նախագիծը և կառավարության առաջարկած օրենսդրական փաթեթը` «Հասարակական սպասարկման կարգավորման մարմնի ստեղծման մասին» օրենքի մեջ փոփոխություններ և հավելումներ մտցնելու մասին։
Նախագծով նախատեսվում է բարձրաստիճան պաշտոնատար անձանց էթիկայի հանձնաժողովի հենքի վրա ստեղծել կոռուպցիայի կանխարգելման հարցերով մարմին, որն իրականացնելու է կոռուպցիայի կանխարգելման, այդ թվում՝ էթիկայի, շահերի բախման, անհամատեղելիության պահանջների, բարձրաստիճան պաշտոնատար անձի և հանրային ծառայողի նկատմամբ կիրառվող այլ սահմանափակումների պահպանման գործառույթը:
Նախագծի հիմնական զեկուցող, ԱԺ փոխնախագահ Արփինե Հովհաննիսյանն ասաց, որ այս մարմինն օժտված է լինելու անհրաժեշտ գործիքակազմով, այդ թվում՝ պատժամիջոցների կիրառման կարողությամբ:
Նրա անդրադարձավ նաև «Հանրային ծառայության մասին» ՀՀ օրենքում փոփոխություններ և լրացումներ կատարելու մասին օրենքի նախագծի առանցքային դերին։ Ըստ նրա` բարձրաստիճան պաշտոնյաներից բացի, տվյալներ են ներկայացնելու նաև նրանց ընտանիքի անդամները։ Այսինքն հայտարարատուների ցանկն ընդլայնվում է, և այսօրվա մոտ 500 պաշտոնատար անձանցից հայտարարատու պաշտոնատար անձինք են դառնում մոտ 2200 հոգի։
«Հայտարարատուների շրջանակի ընդլայնումը պետք է կատարվի փուլ առ փուլ, և միանգամից բոլոր ոլորտներն ընդգրկվել չեն կարողանում։ Այս ցանկում այս պահին ներառված են բոլոր դատախազները, քննիչները, ՔԿՀ և ԴԱՀԿ գլխավոր պաշտոններ զբաղեցնող անձինք, հատուկ ծառայություններում պաշտոններ զբաղեցնող անձինք և գնումների վերաբերյալ խորհրդի անդամները», – ասաց Հովհաննիսյանը։
Նա նշեց, որ ստեղծվող մարմինն առաջին հերթին ստուգելու է պաշտոնատար անձանց հայտարարագրերն ու դրանց իսկությունը։ Խախտումների հայտնաբերման դեպքում համապատասխան մարդիկ կպատժվեն։
Կանխարգելիչ մարմինն իրականացնելու է պաշտոնատար անձանց հայտարարագրերի ստուգում, դրանց արժանահավատության ստուգում, վերլուծություն և այդ վերլուծության արդյունքում համապատասխան խախտումների հայտնաբերման դեպքում՝ վրա է հասնելու պատասխանատվություն։
«Հաջորդ գործառույթն այն է, որ կարող է կատարել բարձրաստիճան պաշտոնատար անձանց անհամատեղելիության պահանջների և սահմանափակումների հարցերի քննություն, էթիկայի և իրավիճակային շահերի բախման հարցերի քննարկում։ Մարմինը քննչական գործառույթներ չի ունենալու»,- ասաց նա։
Կոռուպցիայի կանխարգելման հարցերով զբաղվող մարմինն ունենալու է 5 անդամ։ Այդ անդամներին ընտրելու է խորհրդարանը պատգամավորների ձայների մեծամասնությամբ:
Կոռուպցիայի կանխարգելման մարմնի անդամների թեկնածուների առաջադրման համար ստեղծվել է մրցութային խորհուրդ, որի անդամներին ներկայացնելու է Դատավորների բարձրագույն խորհուրդը, Մարդու իրավունքների պաշտպանը, Փաստաբանների պալատը, Սահմանադրական դատարանի նախագահը և Հանրային խորհուրդը։
Մարմինը գործելու է 2018 թվականի ապրիլից հետո։
