ԵՐԵՎԱՆ, 4 հունիսի-Sputnik. Ավանդական դարձած ուղիները՝ Գառնին, Գեղարդը, Սուրբ Էջմիածինը ցուցադրելուց հետո տուրօպերատորներից մեկի գործադիր տնօրեն Օլեգ Կարախանյանը պատրաստվում է զբոսաշրջիկներին ծանոթացնել նաև հայկական նիստուկացին, խնջույքներին ու սովորույթներին:
«Մեր ժոողվուրդը մեր ռեսուրսն է: Քանի որ զբոսաշրջիկն իր հետ տանում է տպավորություն, պետք է այնպես ցուցադրել երկիրը, որ նա հասկանա նաև հայ ժողովրդին ու նրա պատմությունը»,-ասաց Օլեգ Կարախանյանը:
Սյունիքի մարզի Կապան քաղաքից 4 կմ հեռավորության վրա գյուղ հիշեցնող մի թաղամաս կա՝ Բաղաբուրջ անունով, որը երբևէ զբոսաշրջիկ չի տեսել: Ինչպես Կարախանյանն է պատմում, այնտեղ կա հիասքանչ բնություն, ավանդապաշտ մարդիկ, որոնք կհետարքրքեն զբոսաշրջիկներին: Ռուսաստանից ժամանող առաջին խմբին Կարախանյանը կուղեկցի նաև Բաղաբուրջ:
«Այնտեղ, գյուղական տան մեջ լինելու է արարողություն, զբոսաշրջիկները կտեսնեն, թե ինչպես են բնակիչները թթի օղի պատրաստում, նրանք կմասնակցեն նաև գյուղական քեֆերին: Իսկ առավոտյան կարթնանան, կհամտեսեն գյուղական նախաճաշը: Մենք մեծ տեղ ունենք զարգացնելու էկոտուրիզմը, հատկապես այս կողմերում: Կապանը զբոսաշրջային ուղիներից հեռու է մնում, այսպիսի ծրագրերը մոտիվացիա են մարդկանց համար»,-ասաց Օլեգ Կարախանյանը:
Ըստ նրա կազմած ծրագրի՝ 5 օրում զբոսաշրջիկները կծանոթանան Հայաստանին: Այս ժամանակահատվածը փոքր է Հայաստանը բացահայտելու համար, բայց հիմք կհանդիսանա, որ այցելությունները շարունակական լինեն:
Ի դեպ, Օլեգ Կարախանյանը նկատել է, որ այն զբոսաշրջիկները, որոնք Հայաստան են գալիս Վրաստանով, ապատեղեկատվության «թիրախ» են դարձած լինում, մինչև իրական աչքերով չեն տեսնում մեր երկիրը:
«Ռուսաստանից ժամանող հյուրերին բազմիցս դիմավորել եմ Բագրատաշենից, վրացիները նրանց ասում են` այ հիմա կգնաք Հայաստան, հեքիաթներ կպատմեն ձեզ, իբր ամենահին գինգործական երկիրն են, չլսեք, մեր գինին փորձեք: Իսկ մենք ոչ թե քննադատում ենք վրացիներին, այլ ճիշտ ուղով ներկայացնում ենք մերը, հյուրին թողնում, որպեսզի նա համեմատի: «Արենի 1» քարանձավը միայն ապացուցում է, որ մենք գինոգերծությամբ զբաղվել ենք 6 հազար տարի առաջ»,-պատմեց Կարախանյանը:
Տեղեկացնենք, որ զբոսաշրջությունը Հայաստանում աճի միտում ունի: Ինչպես ավելի վաղ ներկայացրել էր ՀՀ տնտեսական զարգացման և ներդրումների նախարարության զբոսաշրջության պետական կոմիտի նախագահ Զարմինե Զեյթունցյանն, այս տարվա առաջին չորս ամիսներին 25 տոկոսի աճ է արձանագրվել նախորդ տարվա նույն ժամանակահատվածի համեմատ: Իսկ միայն ապրիլին 45 տոկոս աճ է արձանագրվել:
Իհարկե, Զեյթունցյանն այս թվի տարբերության մեջ տեսնում է նաև ապրիլյան քառօրյայի գործոնը: Հայաստան եկող զբոսաշրջիկների գերակշիռ մասը Ռուսաստանի Դաշնությունից, Իրանից, Չինաստանից և Ֆիլիպիններից են:
Ավելացնենք, որ ՌԴ-ից զբոսաշրջիկների հոսքն ավելացավ, երբ կառավարությունը որոշեց՝ Ռուսաստանի քաղաքացիները Հայաստան կկարողանան ժամանել նաև ներքին անձնագրերով: Որոշման՝ ուժի մեջ մտնելուց մեկ ամիս հետո Հայաստան ժամանեց 3091 ՌԴ քաղաքացի:
