ԵՐԵՎԱՆ, 4 հունիսի — Sputnik, Խաչիկ Չախոյան. Խաղից մեկ օր առաջ թիմերը վերջին մարզումը անցկացրին «Հանրապետական» մարզադաշտում: Մեր հավաքականի կազմում մարզմանը չմասնակցեց Գոռ Մալաքյանը, որը վնասվածքի պատճառով բաց կթողնի առաջիկա հանդիպումները:
Մարզումներից առաջ երկու մարզիչներն էլ առաջիկա խաղի հետ կապված զրուցեցին լրագրողների հետ: Ինչ-որ անակնկալ նորություններ չիմացանք, բայց, բնականաբար, հետևություններ պետք է անել:
Հայաստանի հավաքականը Գոռ Մալաքյանի կորստից հետո, արդեն որոշակի խնդիր կունենա հենակետային կիսապաշտպանի դիրքում: Մեր հավաքականի կազմում Մալաքյանը կենտրոնում գործում էր Արտակ Գրիգորյանի հետ ու, ընդ որում, հաճախ մասնակցում մեր թիմի գրոհներին: Թե ինչպիսի փոփոխություն կլինի մեր ընտրանու կազմում՝ կարող ենք հասկանալ այսօրվա խաղի ընթացքում:
Մեր թիմի գլխավոր մարզիչ Արթուր Պետրոսյանը նշեց, որ պարտադիր չէ, որ Սենտ Քիթսի և Նևիսի հետ խաղում հավաքականի կազմը լինի նույնն՝ ինչ որ Չեռնոգորիայի հետ խաղադաշտ դուրս կգա: Մարզիչը փորձարկելու է տակտիկական նոր տարբերակներ, բացի այդ, նաև խաղալու ժամանակ են ստանալու նախկինում ոչ միշտ խաղադաշտ դուրս եկած ֆուտբոլիստները:
Ընկերական խաղերը հիմնականում հենց նման նպատակ են հետապնդում. նախապատրաստել թիմին առաջիկա կարևոր խաղին՝ մարզչի տրամադրության տակ գտնվող խաղացողների մարզավիճակին իրական գնահատական տալով: Անկախ ամեն ինչից, մեր հավաքականն իր կազմով և վարպետությամբ ուժեղ է մրցակցից ու ֆավորիտ է այս մրցավեճում:
Այդ ամենը հաստատեց նաև Սենթ Քիթսի և Նևիսի գլխավոր մարզիչ Ժակ Պասին՝ նշելով, որ ծանոթ է մեր հավաքականի առաջատար Հենրիխ Մխիթարյանին ու գիտի, թե ինչ նվաճումների է արդեն հասել մեր թիմի ավագը: Բայց Մխիթարյանի դեմ անհատական խաղալ մրցակիցը չի պատրաստվում՝ ապավինելով թիմային խաղին: Միևնույն ժամանակ, հարց է՝ արդյո՞ք մեկնարկային կազմում Հենրիխը դուրս կգա թե կմտնի փոխարինման:
Հասկանալի է, որ Արթուր Պետրոսյանը Մխիթարյանին կարող է, պարզապես, որոշակի հանգիստ տալ Չեռնոգորիայի խաղից առաջ: Բայց մեր մարզիչը նշեց, որ Մխիթարյանը խաղադաշտ դուրս կգա, միայն թե՝ դեռևս որոշված չէ, թե ինչքան ժամանակ կլինի խաղի մեջ: Միևնույնն է, Հայաստանի հավաքականը շատ գործոններով է գերազանցում մրցակցին: Ժակ Պասին հատուկ նշեց, որ իր երկիրը «Հանրապետական» ստադիոնի (մոտ 16 հազար նստատեղ) եռակի չափի ժողովուրդ ունի և, իհարկե, այս խաղում դրական արդյունքը լուրջ անակնկալ կլինի նրա համար:
Բայց, դե, մյուս կողմից էլ պարզ է, որ մեր թիմն իր ավելի բարձր կարգն ու հաղթանակի հասնելու հավակնությունները պետք է ապացուցի խաղով: Մեր թիմը շատ աշխույժ ու ինտենսիվ մարզում անցկացրեց խաղի նախօրեին: Տղաների տրամադրությունը բարձր էր ու մարտական: Մնում է այդ ամենը փոխանցել խաղադաշտ արդեն խաղի ժամանակ: Արթուր Պետրոսյանն էլ իր հերթին նշեց, որ բոլոր թիմերն էլ խաղադաշտ են դուրս գալիս հաղթելու համար, ու այս առումով բացառություններ չկան:
