ԵՐԵՎԱՆ, 1 հունիսի — Sputnik. Ղարաբաղյան հակամարտության «ստատուս-քվոյի» հետագա պահպանումն անընդունելի է, հունիսի 1-ին տեղի ունեցած մամուլի ասուլիսի ժամանակ հայտարարեց Հայաստանում Ֆրանսիայի արտակարգ և լիազոր դեսպան Ժան Ֆրանսուա Շարպանտիեն։
Նա նշեց, որ անհրաժեշտ է առավելագույն ջանքեր գործադրել երկու կողմերի համար առավել օպտիմալ, ընդունելի և երեք հայտնի սկզբունքների վրա հիմնված լուծումներ գտնելու համար։
Համանախագահների առաքելությունն է առավելագույն ջանքեր գործադրելով` առավել օպտիմալ լուծում գտնել։
«Սակայն բուն որոշումը կախված է ոչ թե ԵԱՀԿ ՄԽ-ից։ Հակամարտող կողմերը պետք է ընդունեն այդ որոշումը», — նշեց դեսպանը։
Ինչ վերաբերում է համանախագահների վերջին հասցեական հայտարարությանն, ապա Շարպանտիեի խոսքով` սա առաջին նմանատիպ հայտարարությունը չէ, շատ բաներ կարելի էր «կարդալ տողերի արանքում» նաև նախորդ հայտարարությունների ժամանակ։
Դեսպանը հիշեցրեց, որ վերջերս տեղի ունեցավ Ֆրանսիայի նախկին նախագահ Ֆրանսուա Օլանդի և Հայաստանի նախագահ Սերժ Սարգսյանի հանդիպումը, որի ընթացքում Օլանդը ևս մեկ անգամ ընդգծեց, որ Ֆրանսիան պատրաստ է, անհրաժեշտության դեպքում, հարթակ տրամադրել Հայաստանի և Ադրբեջանի ղեկավարությանը` ապագա հանդիպումների համար։
ԵԱՀԿ ՄԽ վերջին հայտարարության մեջ ասվում է, որ մի քանի հավաստի աղբյուրներից ստացված տեղեկության համաձայն, մայիսի 15-ին Ադրբեջանի ԶՈՒ-ն հրթիռային հարված էր հասցրել ռազմական տեխնիկայի ուղղությամբ շփման գծի ողջ երկայնքով։ Մայիսի 16-ի երեկոյան, ինչպես նաև մայիսի 17-ին, հայկական ԶՈՒ-ն տարբեր տրամաչափի ականանետային զինատեսակներ կիրառեց։
