ԵՐԵՎԱՆ, 31 մայիսի — Sputnik. Աստանայում բացառիկ գրքերի ու ձեռագրերի ազգային կենտրոն բացելու առաջարկությամբ հանդես է եկել Ղազախստանի մշակույթի նախարար Արիստանբեկ Մուհամեդիդուլին։
Գաղափարը ծնվել է Հայաստան կատարած այցից հետո։ Այս մասին հայտնում է BNews.kz-ը։
«Հոգևոր արժեքը պարփակված է գրքերում ու ձեռագրերում։ Եվ այսօր Աստանայում Ազգային արխիվի հիման վրա նախարարի նախաձեռնությամբ ստեղծվում է բացառիկ գրքերի ու ձեռագրերի ազգային կենտրոն։ Գաղափարը ծնվեց, երբ մենք երկու ամիս առաջ այցելեցինք Հայաստան և եղանք Մատենադարանում, որտեղ գրքի միջոցով ցուցադրվում է Հայաստանի ամբողջ պատմությունը»,– ասել է Ղազախստանի ազգային ակադեմիական գրադարանի ղեկավար Ումուտկան Մունալբաևը։
Նա նշել է, որ Մատենադարանում պահված ձեռագրերում տեղեկություններ կան նաև ղազախների պատմության մասին, և այժմ ղազախական կողմը բանակցություններ է վարում հայկական կողմի հետ այդ տեղեկություններն ուսումնասիրության նպատակով իրենց տրամադրելու համար։
