ԵՐԵՎԱՆ, 31 մայիսի – Sputnik, Խաչիկ Չախոյան. Ֆուտբոլի ազգային հավաքականի և «Փյունիկ» ֆուտբոլային ակումբի վաճառելու մասին հարցերը ասուլիսի հիմանական նպատակն էին, բաց եղան ոչ պակաս կարևոր հարցերի քննարկումներ: Ռուբեն Հայրապետյանն անդրադարձավ նաև իր ունեցվածքը վաճառելու և Հայաստանից հեռանալու թեմային։
«Ինձանից ամուր Հայաստանի հողի վրա քիչ մարդիկ են կանգնած: Ես դասալիք չեմ և անհեթեթ եմ համարում Հայաստանից հեռանալու մասին լուրերը: Ինչ մնում է վաճառելուն, ապա ոչ թե վաճառել եմ, այլ կոնկրետ զիջել եմ «Փյունիկ» ֆուտբոլային ակումբի սեփականությունը, և հիմա այդ ակումբն արդեն ուրիշ մարդու է պատկանում: Կրկնում եմ` վաճառքի մասին խոսք չկա: Ես պարզապես զիջել եմ սեփականատիրոջ իրավունքը»,- վստահեցրեց նա:
Բնականաբար Հայաստանի ֆուտբոլի ֆեդերացիայի նախագահի և լրագրողների համար շատ կարևոր հարցերից մեկը դարպասապահ Դավիթ Յուրչենկոյի հետ կապված խնդիրն է։ Հիշեցնենք` Յուրչենկոն, որը խաղում է Ռուսաստանի «Անժի Մախաչկալա» թիմում, հրավիրվել է Հայաստանի ֆուտբոլի ազգային հավաքական, նշել է, որ իր հետ ոչ ոք կապ չի հաստատել և ինքը դիտվում է որպես պահեստային դարպասապահ։
«Դավիթ Յուրչենկոն մեզ հիմա շատ է հարկավոր, և ես նորից եմ հայտարարում, որ գրկաբաց կընդունենք նրան հավաքական: Բայց եթե նա հիմա չգա, ապա այլևս նրա կարիքը մենք չենք ունենալու ու չենք էլ հրավիրելու»,- ասաց Հայրապետյանը։
Պարզ է, որ ֆեդերացիայի նախագահը կարևորում է մեր հավաքականի առաջիկա պաշտոնական խաղերը, որոնցում հաջողության հասնելու դեպքում Հայաստանի հավաքականը կարող է և աշխարհի առաջնության ուղեգրի համար պայքարել:
Ֆեդերացիայի նախագահը խոսեց նաև Հայաստանի բարձրագույն խմբի առաջնության ու նորաստեղծ ակումբների մասին։
«Համաձայն եմ, որ բարձրագույն խմբի առաջնության մակարդակը ցածր է, ու այդ պատճառով էլ ֆուտբոլասերները չեն գալիս ստադիոն: Բայց ինչ կարող եմ ասել, դա է ներկայիս վիճակը: Ակումբների առայժմ մեծ բյուջե չունեն, որ կարողանան բարձրացնել խաղամակարդակը»,- ասաց նա:
Ուրախալի է, որ 2017/18 թվականների մրցաշրջանում Հայաստանի առաջին լիգայի մրցաշարին մասնակցելու են նորաստեղծ ակումբեր։
«Շատ լավ է, որ առաջին խմբի մրցաշարին մասնակցելու են Վանաձորի «Լոռին» և Երևանի «Արցախը»: Իսկ համապատասխան տեղ զբաղեցնելու դեպքում այդ թիմերը կխաղան նաև բարձրագույն խմբում: Այդ ակումբերի ղեկավարները վստահեցրել են, որ ամեն ինչ կանեն թիմերի մասնակցության համար ու ես նրանց վստահում եմ», — նշեց Ռուբեն Հայրապետյանը:
Եվ վերջապես ՀՖՖ նախագահը առանձնակի շնորհավորեց ֆուտբոլային Հայաստանին Հենրիխ Մխիթարյանի ձեռքբերման կապակցությամբ։
«Հենրիխը մեզ հպարտանալու հերթական առիթը տվեց, և ես շնորհավորում եմ բոլորին նաև հաղթանակի կապակցությամբ: Եվրոպայի լիգայի գավաթը նվաճելը մեծ ձեռքբերում է նրա և բոլորիս համար»,- ասաց Հայրապետյանը։
Նա հույս հայտնեց, որ գուցե այս դեպքում արդեն Հենրիխ Մխիթարյանը տեղ կգտնի նաև Հայաստանի լավագույն տասը մարզիկների ցանկում։
Նշենք, որ չնայած միջազգային մեծ հեղինակությանը և բազմաթիվ նվաճումներին` Մխիթարյանի անունն անցած մրցաշրջանում չներառվեց Հայաստանի լավագույն 10 մարզիկների ցանկում։
