ԵՐԵՎԱՆ, 30 մայիսի — Sputnik. Կառավարության աշխատակազմի ղեկավարն այլևս նախարար չի լինի, բայց կշարունակի ստանալ նախարարին հավասար աշխատավարձ։ Բացի այդ, ԱԺ աշխատակազմի ղեկավարի աշխատավարձը ևս կբարձրացվի` հավասարեցվելով գործադիր մարմնի իր գործընկերոջ աշխատավարձին։ Համապատասխանաբար կբարձրացվեն նաև վերջինի տեղակալների, օգնականների ու խորհրդականների աշխատավարձերը։
Կառավարության առաջարկած այս փոփոխություններն ԱԺ-ին ներկայացրեց Արդարադատության փոխնախարար Արթուր Հովհաննիսյանը։
«Ելք» խմբակցության ղեկավար Նիկոլ Փաշինյանը նկատեց, որ ամեն ինչ մնում է անփոփոխ, «հանվում է միայն նախարար բառը»։ Նիկոլ Փաշինյանն իր ելույթում եզրակացրեց, որ իշխանությանն ուղղակի չի հաջողվել համաձայնության գալ աշխատակազմի ղեկավար-նախարարի անձի շուրջ։ «Եվ որոշվել է «նախարար» բառը հանել և կնքել զինադադար»,- ասաց Փաշինյանը։
ԱԺ ՀՅԴ խմբակցության պատգամավոր Աղվան Վարդանյանն էլ աշխատավարձերի առաջարկվող փոփոխություններն «անտրամաբանական» որակեց։
ԱԺ-ն առաջին ընթերցմամբ ընդունեց ՀՀ գործադիրի անդամների թիվը մեկով նվազեցնելու և ԱԺ աշխատակազմի ղեկավարի ու աշխատավարձը նախարարների աշխատավարձին հավասարեցնելու առաջարկը։
Քվեարկությունը կշարունակվի վաղն առավոտյան։
