ԵՐԵՎԱՆ, 30 մայիսի — Sputnik. Կառավարության նախաձեռնած ԱԺ արտահերթ նիստն այսօր սկսվեց բուռն քննարկումներով։ Խոսքը կառավարության ներկայացրած օրակարգային հարցերը հրատապ ընթացակարգով քննարկելու մասին է, ինչը ենթադրում է, որ այդ հարցերի քննարկման համար հատկացվում է խիստ սահմանափակ ժամանակահատված։ Այս որոշումը հարուցեց ընդդիմադիր պատգամավորների դժգոհությունը։
«Ելք» դաշինքի պատգամավոր Էդմոն Մարուքյանը կարծիք հայտնեց, որ սրանով սահմանափակվում է խորհրդարանական աշխատանքի ձևն ու բովանդակությունը, և իր գործընկերներին առաջարկեց մեկ անգամ տապալել կառավարության առաջարկած հրատապ հարցերի ընդունումն ու ստիպել այսուհետ հարգել պատգամավորներին։
«Եթե մենք ուզում ենք զարգացնել պառլամենտարիզմը, նման հապճեպ քննարկումներով ճիշտ հակառակ արդյունք կստանանք»,- ասաց Մարուքյանը։
ԱԺ փոխնախագահ Արփինե Հովհաննիսյանն ի պատասխան դժգոհեց.
«Խորհրդարանը դեռ նոր է սկսում իր աշխատանքը, բայց մենք արդեն խոսում ենք իրավունքների ոտնահարումից»,- ասաց փոխխոսնակը։
Ու թեև ընդդիմությունը դեմ էր քննարկման հրատապ ընթացակարգին, բայց օրակարգի հետագա հարցերը քննարկվեցին հենց այդ կարգով։
